एनभीएलमा काठमाण्डौले कर्णालीलाई हरायो

काठमाण्डौ – लगातार तीन खेल जितेको कर्णाली शिवराजलाई ३–१ ले हराउँदै काठमाण्डौ रेड्सले नेपाल भलिबल लिग (एनभीएल) मा महत्त्वपूर्ण जित निकालेको छ ।

जारी लिगमा कर्णालीले पहिलो हार बेहोरेको छ । काठमाण्डौको यो तेस्रो जित हो । उसले प्लेअफको सम्भावनालाई बलियो बनाएको छ ।

कर्णाली र काठमाण्डौले समान ४ खेलबाट समान ८ अंक जोडेका छन् । हिजै भएको खेलमा खप्तड फाल्कन्स एनभीएलको प्लेअफ दौडबाट बाहिरिने पहिलो टोली बनेको छ । एनभीएलमा आज लिग चरणका अन्तिम ३ खेल हुनेछन् ।

पहिलो खेल अन्नपूर्ण र सगरमाथाबीच दिउँसो १ बजे, दोस्रो खेलमा कर्णाली र मधेसबीच दिउँसो ४ बजे तथा तेस्रो खेल बेलुकी ७ बजे काठमाण्डौ र खप्तडबीच हुनेछ । प्रतियोगितामा ६ टोली सहभागी छन् ।