टी–२० मा अफगानिस्तानमाथि भारतको सहज जीत

काठमाण्डौ - भारतले अफगानिस्तानलाई पहिलो टी–२० अन्तर्राष्ट्रिय खेलमा ७ विकेटले हराएको छ ।

नयाँ दिल्लीको अरुण जेट्ली रंगशालामा अफगानिस्तानले दिएको १ सय ५७ रनको लक्ष्य भारतले १३ ओभर ४ बलमा ३ विकेट गुमाएर पूरा गरेको हो । भारतको जितमा अभिषेक शर्माले उत्कृष्ट ब्याटिङ गर्दै ३२ बलमा ८२ रन बनाए । उनले ७ चौका र ७ छक्का प्रहार गरे ।

यस्तै, इशान किशनले ३३ बलमा ४२ रन बनाए । यसअघि टस जितेर पहिला ब्याटिङ गरेको अफगानिस्तानले निर्धारित २० ओभरमा ८ विकेट गुमाएर १ सय ५६ रन बनाएको थियो । अफगानिस्तानका अजमतुल्लाह ओमरजाईले ६४ रन बनाए भने मोहम्मद नाबीले ३३ रन जोडे । भारतका अर्शदीप सिंहले ३ विकेट लिए ।

अफगानिस्तानका नाबीले भारतका २ विकेट लिए । अभिषेक शर्माको आक्रामक ब्याटिङसँगै भारतले लक्ष्य सहज रूपमा पूरा गर्दै तीन खेलको शृङ्खलामा अग्रता लिएको छ ।

तीन खेलको टी–२० श्रृंखला अन्तर्गत दोस्रो खेल भोलि र तेस्रो तथा अन्तिम खेल बिहीबार हुनेछ ।