सर्लाहीमा मोटरसाइकल ठोक्किँदा दुईको जनाको ज्यान गयो, दुई जना घाइते

काठमाण्डौ – सर्लाहीको सिर्सियामा दुई वटा मोटरसाइकल ठोक्किँदा दुई जनाको ज्यान गएको छ ।

दुई जना घाइते भएका छन् । कबिलासी नगरपालिका–७ सिर्सियाको मलङ्गवा–नवलपुर सडकखण्डमा मधेस प्रदेश ०३–०३३ प ७८२४ नम्बरको मोटरसाइकल र बिआर ३० एपी १२२४ नम्बरको भारतीय मोटरसाइकल हिजो बेलुका ठोक्किएका हुन् ।

दुर्घटनामा ७८२४ नम्बरको मोटरसाइकलका चालक सर्लाहीको गोडैता नगरपालिका–६ का ३० वर्षीय सुमित यादव र १२२४ नम्बरको मोटरसाइकलका चालक सर्लाहीको कबिलासी–८ का २६ वर्षीय पप्पु पासवानको ज्यान गएको जिल्ला प्रहरी कार्यालय सर्लाहीका प्रहरी नायब उपरीक्षक वेदप्रसाद गौतमले जानकारी दिनुभयो । दुर्घटनापछि गम्भीर घाइते यादव र पासवानको उपचारका क्रममा प्रादेशिक अस्पताल मलङ्गवामा ज्यान गएको हो ।

दुर्घटनामा घाइते भएका सुरेन्द्र पासवान र बब्लुकुमार पासवानको प्रादेशिक अस्पताल मलङ्गवामा प्राथमिक उपचारपछि थप उपचारका लागि जनकपुर पठाइएको छ ।