प्रहरीले ७१औँ प्रहरी दिवसको अवसरमा ‘टिकटक प्रतियोगिता’ आयोजना गर्ने

काठमाण्डौ – नेपाल प्रहरीले ७१औँ प्रहरी दिवसको अवसरमा ‘टिकटक अवेयरनेस प्रतियोगिता’ आयोजना गर्ने भएको छ ।

प्रहरीले आज एक सूचना निकालेर प्रतियोगितामा सहभागी हुन आग्रह गरेको हो । प्रतियोगिताका लागि तयार पारिने टिकटक भिडियो व्यक्तिगत गोपनीयता, ट्राफिक व्यवस्थापन, लागूऔषध नियन्त्रण र प्रहरी सेवासम्बन्धी विषयमा आधारित हुनुपर्नेछ ।

भिडियो मौलिक, नेपाली भाषामा बनाइएको हुनुपर्ने प्रहरीले जनाएको छ । प्रतियोगितामा उत्कृष्ट हुने भिडियोलाई ५० हजार रुपैयाँ र सान्त्वना स्थान हासिल गर्ने भिडियोलाई १० हजार रुपैयाँसहित प्रशंसा पत्र प्रदान गर्ने सूचनामा भनिएको छ ।

सहभागीले भिडियो पोस्ट गर्दा नेपाल प्रहरीको आधिकारिक पेजलाई मेन्सन गर्नुपर्नेछ । भिडियो बुझाउने अन्तिम मिति असोज २५ गतेसम्म तोकिएको छ ।