एमाले बैठकमा कार्यदलको प्रतिवेदन पेस गर्न माग, नेतृत्वको कार्यशैलीमाथि प्रश्न

काठमाण्डौ - नेकपा एमालेको जारी केन्द्रीय कमिटी बैठकमा निर्वाचन समीक्षा तथा पार्टी पुनर्गठनसम्बन्धी कार्यदलको प्रतिवेदन बैठकमा पेस गरी त्यसमाथि छलफल गर्नुपर्ने माग उठेको छ ।

ललितपुरको भनीमण्डलमा बैठकको दोस्रो दिन अध्यक्ष केपी शर्मा ओलीले प्रस्तुत गरेको राजनीतिक प्रतिवेदनमाथि केन्द्रीय सदस्यहरूले धारणा राख्ने क्रममा यस्तो माग गरेका हुन् । बैठकको सुरुवातमै झपट रावल, कृष्णभक्त पोखरेल, ठाकुर गैरे र कर्ण थापालगायतका नेताहरूले निर्वाचन समीक्षा तथा पार्टी पुनर्गठनसम्बन्धी कार्यदलको प्रतिवेदन केन्द्रीय सदस्यहरूलाई वितरण गरेर त्यसैमाथि समेत छलफल गर्नुपर्ने माग गरेका थिए ।

नेताहरूले पार्टीको नेतृत्व शैली, निर्णय प्रक्रिया र संगठन सञ्चालनको पद्धतिमाथि समेत प्रश्न उठाएका छन् । संस्थागत विधि र पद्धतिलाई बलियो बनाउनुपर्ने तथा पार्टीभित्र आन्तरिक लोकतन्त्र र सामूहिक निर्णय प्रक्रियालाई प्रभावकारी बनाउनुपर्ने उनीहरूको धारणा छ । नेता ठाकुर गैरेले बैठक सञ्चालनको विषयमा समेत प्रश्न उठाउँदै सबै काम अध्यक्षबाटै हुने हो भने सचिवालय र पदाधिकारीको औचित्यबारे प्रश्न गर्नुपर्ने धारणा राखेका छन् ।

बैठकमा बोल्ने धेरैजसो नेताहरूले पार्टीको सङ्गठनात्मक संरचना, कार्यशैली र नेतृत्वको व्यवहारमा सुधार आवश्यक रहेको बताएका छन् । नेताहरूले जनअपेक्षा र तल्लो तहका कार्यकर्ताको भावनालाई सम्बोधन गर्न पार्टीको समग्र पुनर्गठन आवश्यक रहेको बताएका छन् । उपमहासचिव योगेश भट्टराईले अध्यक्ष ओलीलाई छुट्टै लिखित दस्तावेज बुझाउनु भएको छ ।

केन्द्रीय सदस्यहरूले आफ्नो धारणा राख्ने क्रम जारी रहेकाले बैठकमा पार्टीको निर्वाचन समीक्षा, पुनर्गठन, नेतृत्वको कार्यशैली तथा आन्तरिक निर्णय प्रक्रियाबारे थप छलफल हुनेछ ।