एशियाड क्रिकेटको क्वाटरफाइनलमा नेपालले मंगलबार श्रीलंकासँग खेल्ने

जापानमा चलिरहेको २०औँ एशियाली खेलकुदअन्तर्गत पुरुष क्रिकेटमा आज घरेलु टोलीसँगको खेल नतिजाविहिन भएसँगै
समूह विजेता बन्दै क्वाटरफाइनलमा पुगेको छ । नेपाल र जापानले समान १/१ अंक बाँडेका छन् ।

योसँगै नेपाल ३ अंकका साथ समूह ‘ए’को विजेताका रुपमा अन्तिम आठमा पुगेको हो । अब नेपालले मंगलबार बिहान पौने ६ बजे श्रीलंकासँग खेल्नेछ ।

हिजो नेपालसँग ५ विकेटले पराजित भए पनि अफगानिस्तान उपविजेता हुँदै क्वाटरफाइनलमा पुग्यो । उसले भारतसँग खेल्नेछ । आज जापानसँगको खेलमा टस हारेर पहिला ब्याटिङ गरेको नेपालले ४ विकेट गुमाएर १४९ रन बनाएको थियो । यो खेलमा सन्दीप जोराले अविजित ३२ बलमा ५७ तथा लोकेश बमले २२ बलमा ५२ रन बनाएका थिए । आसिफ शेखले २१ रन जोडे ।

वर्षाका कारण खेल १५ ओभरमा झारिएको थियो । तर नेपालले ब्याटिङ गरीसकेपछि फेरि पानी पर्यो र थप खेल हुन सकेन । एशियाली खेलकुदको पुरुष क्रिकेटमा नेपालको यो चौथो सहभागिता हो । नेपाल अहिलेसम्म क्वाटरफाइनलभन्दा अगाडि बढ्न सकेको छैन ।