भारतमा निर्वाचन आयोगका प्रमुखको राजीनामा माग्दै तेस्रो दिन पनि प्रदर्शन

भारतमा मुख्य निर्वाचन आयुक्त ज्ञानेश कुमारको राजीनामा माग गर्दै आइतबार तेस्रो दिन पनि प्रदर्शन भएको छ ।

शुक्रबारदेखि शुरु भएको प्रदर्शन हिजो मुम्बई र नयाँ दिल्लीमा समेत जारी रह्यो । मुम्बईमा हजारौँ मानिस भारतीय झण्डा बोकेर सडकमा उत्रिएका भारतीय सञ्चारमाध्यमले जनाएका छन् ।

उनीहरूले मुख्य निर्वाचन आयुक्त कुमारको राजीनामा माग गरेका छन् । प्रदर्शनको नेतृत्व विपक्षी दलका नेता तथा ‘कक्रोच जनता पार्टी’ अर्थात् सीजेपीका समर्थकहरूले समेत गरेका छन् ।

सीजेपीका प्रमुख अभिजीत दिपकेले सामाजिक सञ्जालमार्फत ‘स्वतन्त्र र निष्पक्ष निर्वाचन’को माग गर्दै प्रदर्शनमा सहभागी हुन आह्वान गर्नुभएको छ ।

तर, भारतीय निर्वाचन आयोगले मतदाता सूची पुनरावलोकनमा अनियमितता भएको आरोप अस्वीकार गरेको छ । मुख्य निर्वाचन आयुक्त ज्ञानेश कुमारले भने प्रदर्शनकारीले माग गरेको राजीनामाका विषयमा सार्वजनिक प्रतिक्रिया दिनुभएको छैन ।

यसैबीच, विपक्षी दलहरूले निर्वाचन आयोगको कार्यालयसम्म मार्च गर्ने र देशभर ‘लोकतन्त्र जोगाऔँ’ अभियान सञ्चालन गर्ने घोषणा गरेका छन् । कक्रोच जनता पार्टीले अबको पाँच दिनपछि अक्टोबर १० मा नयाँ दिल्लीमा ठूलो प्रदर्शन गर्ने तयारी गरेको छ ।