जिङ्क गहुँ–१ को आटा उत्पादन र प्रवर्द्धनबारे नार्क र बिग एग्रोबीच सम्झौता

काठमाण्डौ – नेपाल कृषि अनुसन्धान परिषद् (नार्क) र बिग एग्रो उद्योगबीच ‘जिङ्क गहुँ–१’ को आटा उत्पादन गर्नेबारे सम्झौता भएको छ ।

हिजो ललितपुरमा भएको कार्यक्रममा नार्क र बिग एग्रो उद्योगबीच सम्झौता घोषणा गरिएको हो । नार्क र बिग एग्रो उद्योगले पोषणयुक्त तथा गुणस्तरीय खाद्य उत्पादन बढाउन जिङ्क गहुँ–१ को व्यवसायिक उत्पादन र प्रवर्द्धनमा सहकार्य गर्ने भएका हुन् ।

नार्कका वालि तथा बागवानी अनुसन्धान निर्देशक डा. टिका चापागाईं र बिआइजी एग्रोका अध्यक्ष नवराज बुढाथोकीले उत्पादन तथा प्रवर्द्धनमा सहकार्य गर्ने प्रतिबद्धता जनाउनुभएको छ ।

जिङ्क गहुँ झण्डै १ हजार ८ सय मिटरको उचाइसम्म खेती गर्न सकिने र चार महिनामा पाक्ने जात हो । यसको उत्पादन क्षमता प्रतिहेक्टर ५ टनसम्म रहेको विज्ञप्तिमा उल्लेख छ । यो गहुँमा जिङ्क र आइरनको मात्रा बढी भएकाले पोषणको दृष्ट्रिले महत्वपूर्ण मानिएको छ ।  

निजी बीउ कम्पनीहरूले यो गहुँको बीउ उत्पादनमा झण्डै ९३ प्रतिशत हिस्सा ओगटेको र यसको उत्पादन तथा बजार विस्तारबाट किसानको आम्दानी बढाउन सहयोग पुग्ने अपेक्षा गरिएको छ ।