अमेरिकामा दादुरा सङ्क्रमण बढ्दै, न्युयोर्कमा आपत्काल घोषणा

अमेरिकाको न्युयोर्कमा दादुराको प्रकोप बढेपछि राज्यभर आपत्काल घोषणा भएको छ । न्युयोर्कको गभर्नर क्याथी होकुलले राज्यका विभिन्न क्षेत्रमा दादुराका बिरामीको सङ्ख्या बढेपछि आपत्काल घोषणा गर्नुभएको चिनियाँ समाचार संस्था सिन्ह्वाले जनाएको छ ।

यस वर्ष न्युयोर्कमा अहिलेसम्म १०८ जनामा दादुरा पुष्टि भएको छ । तीमध्ये ९२ जना जुलाई १५ पछि सङ्क्रमित भएका हुन् । धेरैजसो सङ्क्रमित कम खोप लगाइएका ग्रामीण क्षेत्रका बासिन्दा छन् । न्युयोर्क शहरमा पनि ७ जनामा दादुरा पुष्टि भएको छ ।

छिमेकी राज्य पेन्सिलभेनियामा पनि दादुराको सङ्क्रमण बढिरहेको छ । त्यहाँ यस वर्ष अहिलेसम्म ३९ जिल्लामा १ हजार ४ जनामा दादुरा पुष्टि भएको छ । दादुरासँग सम्बन्धित ५ जनाको ज्यान गएको खबरमा उल्लेख छ ।

न्युयोर्क सरकारले दादुराविरुद्धको खोप लगाउन अनुमति पाएका स्वास्थ्यकर्मीको सङ्ख्या बढाएको छ । साथै नागरिकलाई स्थानीय क्षेत्रमा दादुराको जोखिमबारे जानकारी दिन विशेष सूचना प्रणाली सञ्चालनमा ल्याएको छ ।

घोषणा गरिएको आपत्काल आउँदो नोभेम्बर ४ सम्म लागू हुने बताइएको छ । अमेरिकामा यही अक्टोबर १ सम्म यस वर्ष ३ हजार ८८७ जनामा दादुरा पुष्टि भएको छ ।

अमेरिकाका विद्यालय जाने बालबालिकामा खोप लगाउने दर पछिल्ला वर्षमा घटेको छ । सन् २०२५–२६ को शैक्षिक वर्षमा खोप लगाउने दर ९२.४ प्रतिशत रहेको छ । स्वास्थ्य अधिकारीहरूले कम्तीमा ९५ प्रतिशत बालबालिकाले खोप लगाउनुपर्ने लक्ष्य राखेका छन् ।