देशका पश्चिम क्षेत्रमा वर्षा : हावाहुरी र असिनासहित पानी पर्नेक्रम पर्सिसम्म रहने

काठमाण्डौ – अहिले काठमाण्डौ उपत्यकासहित देशका पश्चिम क्षेत्रमा पानी परिरहेको छ ।

चितवनदेखि पश्चिमका तराई र पहाडी धेरैजसो क्षेत्रमा मध्यमसम्मको वर्षा भैरहेको छ । 

चितवन, नवलपुर, तनहुँ, गोरखा, बर्दिया, सुर्खेत, डोटी, कैलाली, कञ्चनपुर र डडेलधुरा आसपासका क्षेत्रमा मेघगर्जन/चट्याङ्ग, हावाहुरीसहित पानी परिरहेको मौसम पूर्वानुमान महाशाखाले जनाएको छ ।

यी क्षेत्रमा थप पानी पर्ने सम्भावना रहेकाले आवश्यक सतर्कता अपनाउन पनि महाशाखाले आग्रह गरेको छ । मेघगर्जन, चट्याङ, हावाहुरी र असिनासहित ठूलो पानी पर्ने क्रम पर्सि शुक्रबारसम्म रहने मौसम पूर्वानुमान महाशाखाले जनाएको छ ।

हिमाली थोरै ठाउँमा पनि हिमपात र मध्यम वर्षाको सम्भावना छ । छोटो समयमै मौसम फेरबदल हुने र हावाहुरी तथा असिनाबाट सम्भावित क्षतिका लागि चनाखो रहन मौसमविद्ले आग्रह गरेका छन् ।