सन् २०३६ को ओलम्पिक आयोजनाका लागि भारतसहित ७ वटा देशको दाबी

काठमाण्डाै – सन् २०३६ को ग्रीष्मकालीन ओलम्पिक आयोजनाका लागि अहिलेसम्म भारतसहित ७ वटा देशले दाबी गरेका छन् ।

प्रतियोगिता आयोजना गर्न भारत, कतार, दक्षिण कोरिया, जर्मनी, दक्षिण अफ्रिका, टर्किए र हङ्गेरी प्रतिस्पर्धामा रहेका अन्तर्राष्ट्रिय ओलम्पिक समिति (आईओसी) ले जनाएको छ । यस्तै अरू देशहरूले ओलम्पिक आयोजनाका लागि यही अक्टोबर ३१ सम्ममा दाबी गर्न सक्नेछन् ।

आउँदो वर्षको मार्चमा आईओसीको कार्यकारी बोर्डले इच्छुक पक्षहरूको संक्षिप्त सूची तयार पार्नेछ र त्यसपछि उनीहरूले ओलम्पिक निकायसँग संवाद शुरू गर्नेछन् ।

सन् २०२८ मा प्राथमिकता प्राप्त आयोजकहरूको नाम घोषणा गरिने र सन् २०२९ को मध्यतिर अन्तिम निर्णय हुने अपेक्षा गरेको अन्तर्राष्ट्रिय ओलम्पिक समितिले जनाएको छ ।

आईओसीले सन् २०३६ को ओलम्पिक आयोजकको मूल्याङ्कन आर्थिक स्रोत तथा राजनीतिक र जनसमर्थनजस्ता पक्षहरूका आधारमा गरिने बताएको छ ।

भारतले प्रधानमन्त्री नरेन्द्र मोदीको गृहराज्य गुजरातको प्रमुख शहर अहमदाबादलाई केन्द्रमा राखेर पहिलो पटक ओलम्पिक आयोजना गर्ने मनसाय व्यक्त गरेको छ ।

अहमदाबादले सन् २०३० को कमनवेल्थ खेलकुद आयोजना गर्दैछ जसलाई ओलम्पिकका लागि एउटा महत्त्वपूर्ण पूर्वाभ्यासका रूपमा हेरिएको छ ।

सन् २०२८ को ग्रीष्मकालीन ओलम्पिक अमेरिकाको लस एन्जलसमा आयोजना हुनेछ भने सन् २०३२ को संस्करणको आयोजना गर्ने जिम्मा अस्ट्रेलियाको ब्रिस्बेनले पाएको छ ।