विपदमा बेपत्ता भएकालाई ४५ दिनपछि मृत मानिने गरी अध्यादेश सिफारिस

काठमाण्डौ – सरकारले बेपत्ता भएका व्यक्तिलाई मृत घोषणा गर्नुपर्ने अवधि १२ वर्षबाट घटाएर ४५ दिनमा झार्ने निर्णय गरेको छ ।

हिजो बसेको मन्त्रिपरिषद बैठकले विपद्सम्बन्धी केही नेपाल ऐन संशोधनको लागि अध्यादेशमार्फत बेपत्ता व्यक्तिलाई मृतक घोषणा गर्ने विद्यमान व्यवस्था संशोधन गर्न राष्ट्रपतिसमक्ष सिफारिस गर्ने निर्णय गरेको हो ।

अहिलेको कानुनअनुसार कुनै पनि व्यक्ति बेपत्ता भएको १२ वर्ष पुगेपछि मात्र मृत मान्ने व्यवस्था छ । सरकारले अध्यादेशमार्फत् विपदको घटनामा यस्तो अवधि ४५ दिन हुने व्यवस्था गर्न प्रस्ताव गरेको हो ।

मन्त्रिपरिषद् बैठकले भोटेकोशी–त्रिशूली बाढी पीडितकेन्द्रित तीनवटा अध्यादेश जारी गर्न सिफारिस गर्ने निर्णय गरेको छ । भूमि, वन र विपदसम्बन्धी कानुन संशोधन गर्ने अध्यादेश जारी गर्न राष्ट्रपतिसमक्ष सिफारिस गर्ने निर्णय भएको हो ।

विपदमा परेका नागरिकलाई जग्गा उपलब्ध गराउन सहज बनाउने गरी अध्यादेश ल्याउन लागिएको सरकारले जनाएको छ । सरकारले तत्काल आवश्यक देखिएका विषयमा कानुनी व्यवस्था गर्न अध्यादेशमार्फत ऐन संशोधन गर्ने प्रक्रिया अघि बढाएको बताएको छ ।