एन्फाका ११ सदस्यद्वारा कार्यसमिति बैठक बोलाउन माग

काठमाण्डौ – फिफाबाट निलम्बित अखिल नेपाल फुटबल संघ एन्फाको कार्यसमिति बैठक बोलाउन ११ जना सदस्यले लिखित माग गरेका छन् ।

एन्फाको वर्तमान अवस्था, निकासका लागि सरकारी निकायसँग समन्वय तथा आगामी निर्वाचनका विषयमा छलफल गर्न बैठक बोलाउन माग गरिएको हो । वरिष्ठ उपाध्यक्ष वीरबहादुर खड्कासहित ११ जना सदस्यले एन्फा विधानको धारा ३१ को उपधारा २ बमोजिम बैठक बोलाउन माग गरेका हुन् ।

बैठकका प्रस्तावित एजेन्डामा एन्फाको वर्तमान अवस्थाबारे छलफल, समस्या समाधानका लागि नेपाल सरकार, युवा तथा खेलकुद मन्त्रालय र राष्ट्रिय खेलकुद परिषद्सँग आवश्यक पहल तथा समन्वय गर्ने विषय छन् ।

यस्तै, एन्फाको निर्वाचन, एन्फाका सदस्य स्वर्गीय दीपेन धिमालको निधनप्रति शोक प्रस्ताव तथा विविध विषय पनि बैठकको एजेन्डामा राखिएको छ ।

एन्फाको कोषाध्यक्ष रवीन्द्र जोशी र लेखापाल सञ्जीव पाण्डे केन्द्रीय अनुसन्धान ब्युरो सीआईबीको अनुसन्धानका क्रममा पक्राउ परेपछि संस्थाको पछिल्लो अवस्थाबारे थप प्रश्न उठिरहेका बेला ११ सदस्यले बैठकको माग गरेका हुन् ।

बैठकमा एन्फाको वर्तमान अवस्था, निर्वाचन प्रक्रिया र संस्थालाई अघि बढाउने आगामी कार्यदिशाबारे छलफल गर्नुपर्ने सदस्यहरूको माग छ ।