दशैँको लागि गाडीको अग्रिम टिकट बुकिङ खुला

काठमाण्डौ – दशैँ मनाउन घर जाने यात्रुका लागि आजदेखि सार्वजनिक यातायातको अग्रिम टिकट बुकिङ खुला भएको छ । अग्रिम टिकट बुकिङ खुलेसँगै काठमाण्डौ उपत्यकाका बसपार्कमा घर फर्किने यात्रुको चहलपहल बढ्न थालेको छ ।

टिकट लिन यात्रुहरू आज बिहानैदेखि बसपार्क पुग्न थालेका छन् भने केही यात्रु रातिदेखि नै लाइनमा बसेका छन् । ट्राफिक प्रहरीले काठमाण्डौ उपत्यकाका विभिन्न १५ ठाउँमा यात्रु सहायता कक्ष सञ्चालनमा ल्याएको छ ।

लामो तथा मध्यम दूरीका गाडीका लागि यात्रुको चापअनुसार रिजर्भमा सञ्चालन गर्न पर्सि आइतबार घटस्थापनादेखि पूर्णिमासम्म रूट परमिटसमेत खुला गरिएको छ ।

यस्तै नारायणगढ–मुग्लिन सडकखण्डमा घटस्थापनादेखि ठूला अत्यावश्यक वस्तु बोकेका बाहेक अरु मालबाहक गाडी चलाउन रोक लगाइएको छ । सरकारले तोकिएकोभन्दा बढी भाडा नलिन, क्षमताभन्दा बढी यात्रु नराख्न र गाडीको प्राविधिक अवस्था जाँच नगरी नचलाउन भनेको छ ।

यसैगरी प्रहरीले चाडपर्वलाई लक्षित गरी सडक सुरक्षा र ट्राफिक व्यवस्थापनलाई प्राथमिकता दिएको छ । यात्रुको सुरक्षित आवागमन सुनिश्चित गर्न गाडीको निगरानी, चालकको अवस्था, तीव्र गति, जाँडरक्सी खाएर गाडी चलाउने गतिविधि तथा अन्य ट्राफिक नियम उल्लङ्घनमाथि निगरानी बढाएको छ ।