अमेरिका र ग्रिसबीच नयाँ सुरक्षा सम्झौता

अमेरिका र ग्रिसले आतंकवादविरुद्धको अभियान, सूचना आदानप्रदान, रक्षा तथा ऊर्जा क्षेत्रमा सहकार्य थप सुदृढ बनाउने प्रतिबद्धता जनाएका छन् ।

ग्रिस भ्रमणमा रहनुभएका अमेरिकी विदेशमन्त्री मार्को रुबियोले एथेन्समा आयोजित छैटौँ चरणको ‘यूएस–ग्रिस रणनीतिक संवाद’ को उद्घाटन सत्रमा दुई देशबीच नयाँ सुरक्षा समझदारी भएको घोषणा गर्नुभएको चिनीया समाचार संस्था सिन्ह्वाले जनाएको छ ।

समझदारीले आतंकवादविरुद्धको अभियान र सुरक्षा सूचनाको आदानप्रदानलाई थप व्यवस्थित बनाउने अपेक्षा गरिएको छ । विदेशमन्त्री रुबियोले ग्रिसलाई अमेरिकाको भरपर्दो साझेदार र अस्थिर विश्वमा स्थिरताको स्रोतका रूपमा व्याख्या गर्नुभयो । इरान र हर्मुज जलमार्ग क्षेत्रको तनाव, लाल सागरको सङ्कट तथा रुस–युक्रेन युद्धका कारण ग्रिससँगको ऐतिहासिक गठबन्धन थप महत्त्वपूर्ण बनेको उहाँको भनाइ छ ।

ग्रिसका विदेशमन्त्री जर्ज गेरापेट्रिटिसले ऊर्जा क्षेत्रमा दुई देशबीचको सहकार्य अभूतपूर्व स्तरमा पुगेको बताउनुभयो । उहाँले विशेषगरी मध्य तथा पूर्वी युरोपमा अमेरिकी प्राकृतिक ग्यास आपूर्ति विस्तार गर्ने ‘भर्टिकल करिडोर’ मा ग्रिसको भूमिका महत्त्वपूर्ण रहेको उल्लेख गर्नुभयो ।