काठमाण्डौ उपत्यकाका ६ ठाउँबाट जुनसुकै कम्पनीका ग्यास सिलिन्डर साट्न पाइने

काठमाण्डाै – काठमाण्डौ उपत्यकामा दशैँको अवधिभर जुनसुकै कम्पनीका ग्यास सिलिन्डर साट्न पाइने भएको छ ।

दशैँमा ग्यासको आपूर्ति सहज बनाउन ६ ठाउँबाट जुनसुकै कम्पनीका सिलिन्डर साट्न पाइने व्यवस्था गरिएको नेपाल एलपी ग्यास उद्योग सङ्घले जनाएको छ ।

सङ्घका अनुसार घटस्थापना पर्सिदेखि फूलपातीसम्म बालाजुमा रहेको नेपाल ग्यासको उद्योग, पेप्सिकोलामा रहेको सगर ग्यासको गोदाम, सुकेधाराको बाबा ग्यासको डिपो, सिफलमा रहेको एभरेस्ट तथा सुगम ग्यासको केन्द्र, कलङ्कीको साइबाबा र श्रीकृष्ण ग्यासको गोदाम तथा ललितपुरको हरिसिद्धिमा रहेको श्रीराम ग्यासको गोदामबाट बिहान साढे ९ बजेदेखि दिउँसो ४ बजेसम्म निःशुल्क सिलिन्डर साट्न सकिनेछ ।

बजारमा ५८ वटा कम्पनीका ग्यास सिलिन्डर रहेकाले उपभोक्तालाई सिलिन्डर साट्न सहज बनाउन यस्तो व्यवस्था गर्न लागिएको सङ्घले जनाएको छ ।

एक जना उपभोक्ताले एक सिलिन्डर मात्र साट्न पाउनेछन् । सुविधाको दुरुपयोग रोक्न उपभोक्ताको पहिचान र मोबाइल नम्बरसमेत अभिलेख गरिने भएको छ ।