पारा एशियाडमा सहभागी हुने नेपाली टोलीको बिदाइ

काठमाण्डौ – जापानमा हुने ५ औँ एशियाली पारा खेलकुदमा सहभागी हुने नेपाली टोलीलाई बिदाइ गरिएको छ । राष्ट्रिय खेलकुद परिषद् (राखेप) का सदस्य–सचिव रामचरित्र मेहता र राखेपकी सदस्य मोनालिसा खम्बुले टोलीलाई सफलताको शुभकामनासहित हिजो बिदाइ गर्नुभयो ।

जापानको आइची–नागोयमा आउँदो कात्तिक १ देखि ७ गते (अक्टोबर १८ देखि २४ तारिख) सम्म हुने ५ औँ पारा एशियाली खेलकुदमा नेपालबाट विभिन्न ८ खेलमा १९ खेलाडी सहभागी हुँदै छन् ।

तेक्वान्दो र जुडो टोली आज जापान प्रस्थान गर्नेछ भने बाँकी टोली क्रमैसँग जापान जाने छन् । नेपाल पहिलो संस्करणदेखि नियमित रुपमा पारा एशियाडमा सहभागी हुँदै आएको छ । यसअघिका चार संस्करणमा नेपालले एउटा पदक जितेको छ ।

तेक्वान्दोकी पलेशा गोबर्धनले चीनको हाङझाउमा भएको चौथो संस्करणमा कांस्य जितेकी थिइन् । पलेशा पेरिस पारालिम्पिककी पनि कांस्य पदक विजेता हुन् ।