कक्रोच जनता पार्टीको प्रदर्शन : तीन जना पूर्व मुख्यमन्त्रीसहित सयौँ पक्राउ

काठमाण्डौ - भारतमा नवयुवाहरूले नेतृत्व गरेको कक्रोच जनता पार्टी सीजेपीले आज गरेको विरोध प्रदर्शनमा प्रहरीले व्यापक धरपकड गरेको छ ।

सरकारले भारतको राजधानी दिल्लीका कैयौँ ठाउँमा दशौँ हजार सुरक्षाकर्मी परिचालन गरेर सयौँलाई पक्राउ गरेको हो । सीजेपीका अनुसार प्रहरीले हिजो बेलुकादेखि नै पक्राउ गर्ने क्रम सुरु गरेको हो । सीजेपीका नेता अभिजित दिपकेलाई प्रहरीले दिल्ली विमानस्थलमा जहाजभित्रै पसेर पक्राउ गरेको छ ।

सीजेपीका नेताहरू सौरभ दास र आशुतोष राङ्कालाई पनि प्रहरीले पक्राउ गरेको छ । चुनावमा सुधार र प्रमुख निर्वाचन आयुक्त ज्ञानेश कुमारले राजीनामा दिनुपर्ने प्रदर्शनकारीहरूको माग छ । प्रमुख निर्वाचन आयुक्तमाथि मतदाता नामावलीबाट ठूलो सङ्ख्यामा मतदाताहरू हटाइएको आरोप छ । तर भारतको निर्वाचन आयोगले आरोप अस्वीकार गरेको छ । आफ्नो राजीनामाको मागबारे प्रमुख आयुक्तले अहिलेसम्म केही बोल्नुभएको छैन ।

प्रहरीले प्रदर्शनका लागि अनुमति नदिइएको बताएको छ । विरोध प्रदर्शनका क्रममा भारतका तीन जना प्रमुख विपक्षी नेताहरूलाई प्रहरीले पक्राउ गरेको छ । दिल्लीका पूर्व मुख्यमन्त्री अरविन्द केजरीवाल, केरलाका पूर्व मुख्यमन्त्री पिनाराई विजयन र पश्चिम बङ्गालकी पूर्व मुख्यमन्त्री ममता बर्नजीलाई प्रहरीले पक्राउ गरेको हो । प्रदर्शनकारीहरूलाई प्रदर्शन स्थलमा जानबाट रोक्न सरकारले रेलवे सेवा र मेट्रो स्टेशनहरू बन्द गर्नुको साथै इन्टरनेट सेवा पनि अवरुद्ध गरेको छ ।

सीजेपीले गर्न लागेको प्रदर्शनअघि नयाँ दिल्ली र हजरत निजामुद्दीन स्टेशनहरूबाट आउजाउ गर्ने २५० भन्दा बढी रेल सेवाहरू रद्द गरिएको छ । दिल्ली मेट्रो रेल कर्पोरेशन डीएमआरसीले ४५ वटा मेट्रो स्टेसनहरूका प्रवेश र निकास बिन्दुहरू बन्द गरेको जनाएको छ ।