नेकपा एमालेको केन्द्रीय सदस्यमा १३ जना मनोनीत

काठमाण्डौ - नेकपा एमालेको केन्द्रीय सदस्यमा १३ जना मनोनीत भएका छन् । 

आज सकिएको स्थायी कमिटी बैठकले तेजेन्द्र केसी, मीनप्रसाद गुरुङ, सिर्जना राई, पुष्पा केसी भण्डारीसहित १३ जना नेताहरूलाई केन्द्रीय कमिटी सदस्यमा मनोनीत गरेको हो ।

तीन दिनसम्म चलेको स्थायी कमिटी बैठकले पार्टीका वडास्तरका कमिटीहरूको अधिवेशन आउँदो मङ्सिर २६ गते र नगर तथा गाउँपालिका तहका कमिटीहरूको अधिवेशन पुस ४ गतेभित्र सम्पन्न गर्ने निर्णय गरेको सचिव महेश बस्नेतले जानकारी दिनुभयो । 

त्यस्तै, एमालेले मङ्सिर पहिलो हप्ता  प्रदेश र जिल्लाका पदाधिकारी तथा पालिका र जनप्रतिनिधिहरूको सहभागितामा राष्ट्रिय भेला आयोजना गर्ने भएको छ । बैठकले मधेश प्रदेश सभा सदस्य जैनब खातुनको निधनपछि रिक्त पदमा नाजिमा खातुनलाई मनोनयन गरी निर्वाचन आयोगमा पठाउने र अध्यक्ष पद रिक्त रहेका १३ जिल्लामा जिल्ला तहकै निर्णयबाट अध्यक्ष तोकी माथिल्लो कमिटीमा अनुमोदनका लागि पठाउने निर्णय समेत गरेको छ ।