काममा फर्किएका बाढीपीडित व्यवसायीलाई सरसामानको अभाव, सहयोग गर्ने महासंघको प्रतिवद्धता

काठमाण्डौ – भोटेकोशी बाढीबाट विस्थापित रसुवा र नुवाकोटका व्यापारी, व्यवसायीहरु पुरानै ठाउँमा फर्किएर व्यापार व्यवसाय सञ्चालन गर्न थालेका छन् । तर बाढीले व्यवसायका संरचना, उपकरण र आवश्यक सरसामान बगाएपछि उनीहरूलाई पुनः व्यवसाय शुरु गर्न समस्या भएको छ ।

सरकारले राहत प्याकेज घोषणा गरे पनि व्यापारीहरुलाई तत्काल आवश्यक सामग्रीको अभाव छ । बाढीले दूध व्यवसायीका दूध सङ्कलन गर्ने क्यान र दूध चिस्याउने मेसिनसमेत बगाएको छ । त्यस्तै, पसल सञ्चालन गर्न आवश्यक काठका र्‍याक  लगायतका सामग्रीको अभाव छ ।

व्यवसायीले तत्काल आवश्यक सरसामान सहयोग पाए व्यवसाय पुनः सञ्चालन गर्न सहज हुने बताएका छन् । नेपाल उद्योग वाणिज्य महासंघले बाढी प्रभावित व्यवसायीलाई आवश्यक सहयोगका लागि सम्बन्धित जिल्लाका उद्योग वाणिज्य संघमा सम्पर्क 
गर्न आग्रह गरेको छ ।

उज्यालोसँगको कुराकानीमा महासंघका वरिष्ठ उपाध्यक्ष सुरकृष्ण वैद्यले सम्बन्धित जिल्लाका उद्योग वाणिज्य संघमार्फत सहयोग मागेमा सक्दो सहयोग गर्ने प्रतिबद्धता जनाउनुभएको छ । बाढीबाट प्रभावित व्यवसायीलाई दीर्घकालीन राहतसँगै तत्काल आवश्यक सरसामान र पूर्वाधार उपलब्ध गराउन सके उनीहरूलाई पुनः व्यवसायमा फर्किन सहज हुनेछ ।

सरकारले बाढी प्रभावित व्यवसायीका लागि विशेष राहत प्याकेज घोषणा गरिसकेको छ । राहत प्याकेजअन्तर्गत भन्सार तथा कर छुट, बैंक कर्जाको पुनर्संरचना र पुनर्तालिकीकरण, ब्याजदरमा सहुलियत, थप कर्जाको व्यवस्था तथा बीमा दाबी भुक्तानीलाई छिटोछरितो बनाउने निर्णय गरिएको छ । तर, घोषणा गरिएका राहत सुविधाहरू व्यवसायीले अझै पाउन सकेका छैनन् ।

तत्काल व्यवसाय सञ्चालन गर्न आवश्यक सामग्रीको अभावले उनीहरूलाई थप समस्यामा पारेको छ ।