एनपीएलका लागि श्रीलंकाका म्याथ्युज विराटनगरमा र अमेरिकाका शेड्ली लुम्बिनीमा आबद्ध

काठमाण्डौ - श्रीलंकाका क्रिकेटर एन्जेलो म्याथ्युजले नेपाल प्रिमियर लिग (एनपीएल) को तेस्रो संस्करण विराटनगर किङ्सबाट खेल्ने भएका छन् ।

विराटनगर किङ्ग्सले उनी आबद्ध भएको जनाएको हो । म्याथ्युज अन्तर्राष्ट्रिय क्रिकेटमा लामो अनुभव बटुलेका अनुभवी खेलाडी हुन् । श्रीलङ्काको टेस्ट तथा एक दिवसीय टोलीको कप्तानी सम्हालिसकेका ३९ वर्षीय म्याथ्युजले लामो समय राष्ट्रिय टोलीमा महत्त्वपूर्ण भूमिका निर्वाह गरेका छन् । 

उनले आफ्नो अन्तर्राष्ट्रिय करिअरमा टेष्टमा ११९ खेलमा आठ हजार २१४, एक दिवसीयमा २२६ खेलमा पाँच हजार ९१६ र ९० टी–२० अन्तर्राष्ट्रिय खेलमा एक हजार ४१६ रन बनाएका छन् । बलिङतर्फ उनले टेष्टमा ३३, एक दिवसीयमा १२६ र टी–२० अन्तर्राष्ट्रिय क्रिकेटमा ४५ विकेट लिएका छन् । म्याथ्युजले आईपीएल र लङ्का प्रिमियर लिग पनि खेलिसकेका छन् । 

यस्तै, दक्षिण अफ्रिकी मूलका अमेरिकन अलराउन्डर शेड्ली भान स्काल्कविकले लुम्बिनी लायन्सबाट एनपीएल खेल्ने भएका छन् । लुम्बिनीले हिजो सामाजिक सञ्जालमार्फत उनलाई टोलीमा अनुबन्ध गरेको जनाएको हो । 

शेड्लीले अहिलेसम्म १३ एक दिवसीय खेल र १८ टी–२० अन्तर्राष्ट्रिय खेल खेलेका छन् । उनले क्यारेबियन प्रिमियर लिग, लङ्का प्रिमियर लिगलगायत खेलिसकेका छन् । तेस्रो संस्करणको एनपीएल सोमबारदेखि शुरु हुँदैछ ।