फ्रान्समा फेरि भएको व्यापक प्रदर्शनकाक्रममा झन्डै १ हजार जना पक्राउ

फ्रान्समा महँगी, बढ्दो खर्च र विद्यालयको कमजोर अवस्थाको विरोधमा भएको व्यापक प्रदर्शनका क्रममा झडप भएपछि झन्डै १ हजार जना पक्राउ परेका छन् ।

हिजो देशभर लाखौँ मानिस प्रदर्शनमा सहभागी भएका थिए । फ्रान्सको गृह मन्त्रालयका अनुसार प्रदर्शनमा ४ लाख भन्दा धेरै मानिस सहभागी भए । तर, श्रमिक सङ्गठनहरूले भने प्रदर्शनकारीको सङ्ख्या झण्डै आठ लाख रहेको दाबी गरेका बीबीसीले जनाएको छ ।

दिनभर प्रदर्शन शान्तिपूर्ण रहे पनि बेलुका राजधानी पेरिससहित विभिन्न शहरमा प्रदर्शनकारी र प्रहरीबीच झडप भएको थियो । प्रहरीले प्रदर्शनकारीलाई तितरबितर पार्न अश्रुग्यास र पानीको फोहोरा प्रयोग गरेको छ ।

प्रर्दशनकारीहरुले मार्सेई शहरमा सडकमा अवरोध गरेर आगजनी गरेका छन् भने बोर्डोमा केही प्रदर्शनकारीले पसल तथा भवनका काठका संरचना भत्काएका छन् । फ्रान्सका गृहमन्त्री लरेन्ट नुनेजका अनुसार प्रदर्शनका क्रममा २ जना गम्भीर घाइते भएका छन् ।

प्रदर्शनलाई हिंसात्मक बन्न नदिन देशभर झण्डै ७० हजार सुरक्षाकर्मी परिचालन गरिएको थियो । प्रदर्शनकारीले महँगी, करको भार, गरिबी र प्रहरीको व्यवहारप्रति असन्तुष्टि जनाएका छन् । उनीहरूले सरकारबाट आफ्ना माग सम्बोधन नभएसम्म आन्दोलन जारी रहने बताएका छन् । गएको हप्ता भएको प्रदर्शनमा साढे पाँच लाख मानिस सहभागी भएका थिए ।

अघिल्लो हप्ता पनि हिंसा, लुटपाट र तोडफोडका घटनामा २ हजार ५ सयभन्दा बढी मानिस पक्राउ परेका थिए ।