डुबेको जहाजबाट फेला परेको ४०० वर्ष पुरानो ताल्चाको कोड सीटी स्क्यानमार्फत पत्ता लाग्यो

विशेषज्ञहरूले आधुनिक स्क्यानिङ प्रविधिको प्रयोग गरी वेल्सको तट नजिकै समुद्रमा डुबेको जहाजमा फेला परेको एउटा प्राचीन ताल्चा खोल्न चार अक्षरको कोड पत्ता लगाएका छन् ।

४०० वर्ष पुरानो पित्तलको ताल्चा सन् १९९९ मा पोर्ट टलबोटमा रहेको मार्गम नजिकैको बालुवामा मेटल डिटेक्टर प्रयोगकर्ता पिटर ह्युजले फेला पार्नुभएको थियो ।

यो स्पेनबाट फर्कने क्रममा सन् १५८३ डिसेम्बर २८ मा आँधीबेहरीमा परेको ‘एन फ्रान्सिस’ नामक जहाजको विशाल खजानाको एउटा हिस्सा हो । यस जहाजमा रहेको मालसामान शताब्दीयौँसम्म बालुवामुनि लुकेर रहेको थियो ।

सङ्ग्रहालयका विज्ञहरूले ताल्चाको भित्री संयन्त्रको जाँच गर्न अक्षरहरूको सही संयोजन पत्ता लगाउन र रहस्य सुल्झाउन सीटी स्क्यानिङको प्रयोग गरेका बीबीसीले जनाएको छ ।

वरिष्ठ क्युरेटर एलास्टेयर विलिसले ‘एएनसीई’ शब्द बन्ने कोड फेला पर्नुलाई अविश्वसनीय भन्नुएको छ ।

स्पेनी चाँदीका सिक्काहरू र सिक्का तौलने दुई वटा ढकको नजिक फेला परेको ताल्चाले यी वस्तुहरूको सुरक्षा गरेको हुन सक्ने वा कागजात र कपडाजस्ता बहुमूल्य सामग्रीहरू राखिएको बाकसलाई सुरक्षित पारेको हुन सक्ने अनुमान गरिन्छ । यद्यपि ती सामग्रीहरू भने अहिले अस्तित्वमा नरहेका खबरमा उल्लेख छ ।