भारतीय विदेश सचिव मिश्रीले भोलि प्रधानमन्त्री शाहसँग भेटवार्ता गर्ने

काठमाण्डाै – भारतीय विदेश सचिव विक्रम मिश्रीले भोलि प्रधानमन्त्री बालेन्द्र शाहसँग भेटवार्ता गर्नुहुने भएको छ ।

दुई दिने नेपाल भ्रमणका क्रममा आज आउनुभएका भारतीय विदेश सचिव मिश्रीले भोलि स्वदेश फर्कनुअघि प्रधानमन्त्री शाहसँग भेटवार्ता गर्नुहुने भएको हो । नेपालका प्रधानमन्त्रीको आउँदो भारत भ्रमणको तयारीका लागि उहाँ नेपाल आउनुभएको हो ।

भारतीय विदेश सचिव मिश्रीले आजै परराष्ट्र सचिव अमृतबहादुर राईसहितको प्रतिनिधिमण्डलसँग नेपाल–भारत द्विपक्षीय विषयमा छलफल गर्नुभएको छ ।

यस्तै मिश्रीले आज परराष्ट्रमन्त्री शिशिर खनाल र अर्थमन्त्री डा. स्वर्णिम वाग्लेसँग पनि भेटवार्ता गर्नुभएको छ । भ्रमणका क्रममा उहाँले सत्तारूढ दल रास्वपाका सभापति रवि लामिछानेसँग पनि भेट गर्ने कार्यक्रम छ ।

गएको आमचुनावपछि भारतबाट नेपाल भ्रमण गर्ने मिश्री सर्वोच्च कूटनीतिक अधिकारी हुनुहुन्छ ।

प्रधानमन्त्री बालेन्द्र शाहले मङ्सिरको पहिलो हप्ता गर्ने भारत भ्रमणका क्रममा ऊर्जा, व्यापार, पूर्वाधार विकास र यातायात सञ्जाल विस्तारका विषयलाई प्राथमिकतामा राख्ने सरकारको तयारी छ ।

प्रधानमन्त्री बनेपछि शाह पहिलो औपचारिक द्विपक्षीय भ्रमणका लागि भारत जान लाग्नुभएको हो । यसअघि उहाँ संयुक्त राष्ट्रसङ्घको महासभामा भाग लिन अमेरिका जानुभएको थियो ।