भारतीय विदेशसचिव मिश्रीले आज प्रधानमन्त्री शाहसँग शिष्टाचार भेटवार्ता गर्ने

कागठमाण्डौ – नेपाल भ्रमणमा रहेका भारतीय विदेश सचिव विक्रम मिश्रीले आज प्रधानमन्त्री वालेन्द्र शाहसँग शिष्टाचार भेट गर्दै हुनुहुन्छ ।

भ्रमणको दोस्रो दिन आज प्रधानमन्त्री तथा मन्त्रिपरिषद्को कार्यालय सिंहदरबारमा उहाँहरुबीच भेटवार्ता हुनेछ । प्रधानमन्त्री शाहलाई भारतीय प्रधानमन्त्री नरेन्द्र मोदीको सन्देश सुनाएर मिश्री आजै दिल्ली फर्किने कार्यक्रम छ ।

यसअघि हिजो भएका विभिन्न भेटवार्तामा प्रधानमन्त्री शाहको आसन्न भारत भ्रमणका एजेन्डाबारे छलफल भयो । हिजो बिहान काठमाण्डौ आएका भारतीय विदेश सचिव मिश्रीले दिनभर नेपाल सरकारका विभिन्न मन्त्रीहरूसँग छुट्टाछुट्टै भेटवार्ता गरी नेपाल–भारतबिचको सहकार्यका सम्भावित क्षेत्र र भ्रमणका क्रममा उठाउन सकिने विषयबारे छलफल गर्नुभएको हो ।

परराष्ट्र सचिव अमृत राईको निमन्त्रणामा मिश्री नेपालको औपचारिक भ्रमणमा आउनुभएको हो । राईसँग भएको द्विपक्षीय भेटवार्तामा पनि प्रधानमन्त्री शाहको भारत भ्रमणको तयारी तथा सम्भावित एजेन्डाबारे छलफल भएको थियो ।

प्रधानमन्त्रीको भारत भ्रमणका क्रममा हवाई, रेल, सडक तथा पुललगायत पूर्वाधारमार्फत दुई देशबीचको सम्पर्क सञ्जाल विस्तार गर्ने विषयले प्राथमिकता पाउने अपेक्षा गरिएको छ । नेपाल भ्रमणका क्रममा विदेश सचिव मिस्रीले अर्थमन्त्री डा.स्वर्णिम वाग्ले, ऊर्जा, जलस्रोत तथा सिँचाइमन्त्री विराजभक्त श्रेष्ठ र पूर्वाधार विकासमन्त्री सुनिल लम्सालसँग छुट्टाछुट्टै भेटवार्ता गर्नुभयो ।

मंसिर पहिलो हप्तादेखि हुने भनिएको प्रधानमन्त्री शाहको भारत भ्रमणलाई ध्यानमा राखेर विदेश सचिव मिस्रीको नेपाल भ्रमण केन्द्रित रहेको परराष्ट्र मन्त्रालयले जनाएको छ ।