आईजीपी हेरफेरका विषयमा सरकार र सत्तारुढ दलका प्रवक्ताको विरोधाभासपूर्ण अभिव्यक्ति

काठमाण्डौ – मन्त्रिपरिषद्को हिजोको बैठकले नेपाल प्रहरीका प्रहरी महानिरीक्षक (आईजीपी) दानबहादुर कार्कीलाई हटाएर एआईजी डा. मनोज केसीलाई नयाँ आईजीपी नियुक्त गर्ने निर्णय गरेपछि सरकार र सत्तारूढ दलका प्रवक्ताबीच फरक धारणा सार्वजनिक भएको छ ।

रास्वपा नेतृत्वकै सरकार रहेका बेला दुई प्रवक्ताबीच नियुक्ति र जिम्मेवारी हेरफेरको विषयमा फरक फरक अभिव्यक्ति सार्वजनिक भएको हो । मन्त्रिपरिषद्को निर्णय सार्वजनिक गर्ने क्रममा सरकारका प्रवक्ता एवं शिक्षा मन्त्री सस्मित पोखरेलले बदलिँदो परिस्थिति एवं संवेदनशील विषय भएकाले पार्टीकै निर्देशन र सल्लाहका आधारमा आईजीपी कार्कीको जिम्मेवारी हेरफेर गरिएको दाबी गर्नुभएको छ ।

उहाँले यो निर्णय कुनै कारबाही नभई जिम्मेवारी परिवर्तन मात्र भएको र कार्कीलाई प्रधानमन्त्रीको विशेष सुरक्षा सल्लाहकारमा नियुक्त गरिएको जानकारी दिनुभयो । तर रास्वपाका प्रवक्ता जगदीश खरेलले कार्कीलाई पदबाट हटाउने सरकारको निर्णयमा पार्टीको कुनै निर्देशन वा हस्तक्षेप नरहेको बताउनुभएको छ ।

सरकारका प्रवक्ता र सत्तारुढ रास्वपाका प्रवक्ताको भनाइ बाझिएको हो ।

खरेलले सरकार सञ्चालनमा पार्टीले प्रधानमन्त्रीलाई सहयोग गर्ने भए पनि कुनै व्यक्तिलाई पदमा राख्ने वा हटाउने निर्देशन नदिने बताउनुभयो । सरकारका प्रवक्ताले पार्टीको निर्देशनमा निर्णय भएको दाबी गरे पनि रास्वपा प्रवक्ता खरेलले पार्टीको संलग्नता अस्वीकार गरेपछि निर्णयको आधार र प्रक्रियाबारे थप प्रश्न उठेका छन् । नवनियुक्त आईजीपी केसीले हिजो बेलुका कार्यभार सम्हाल्नुभएको छ ।

कार्कीसँग असमझदारी बढेपछि सरकारले केसीलाई आईजीपी नियुक्त गरेको हो । नवनियुक्त आईजीपी केसीलाई हिजो बेलुका गृहमन्त्री सुधन गुरुङले दज्र्यानी चिह्न लगाइदिनुभयो ।  योसँगै गृहसचिवले आईजीपीलाई दज्र्यानी चिह्न लगाइदिने परम्परा समेत तोडिएको छ ।

इनम सापकोटाको अनुसन्धान र विकसित घटनाक्रमकाबिच उत्पन्न विवाद र प्रहरी सञ्चालनमा राजनीतिक हस्तक्षेपका आरोपहरूकैबीच कार्कीलाई पदबाट हटाइएको हो । यसअघि रास्वपाले पत्रकार पक्राउ तथा धरपकडका विषयमा सरकारको जवाफ मागेको थियो ।

तत्कालीन सुशीला कार्की नेतृत्वको अन्तरिम सरकारले वरीयतामा पहिलो नम्बरमा रहेका कार्कीलाई आईजीपीमा नियुक्ति गरेको थियो । त्यसबेला वरीयतामा दोस्रोमा राजन अधिकारी र तेस्रोमा मनोज केसी हुनुहुन्थ्यो ।