मध्यावधि चुनावको परिणामसँगै अमेरिकी संसदमा ट्रम्प प्रशासनलाई नियन्त्रण गर्ने डेमोक्र्याट्हरुको भनाइ

काठमाण्डौ – अमेरिकाको मध्यावधि चुनावपछि संसद्मा बहुमत हासिल गरेको डेमोक्र्याटिक पार्टीले राष्ट्रपति डोनाल्ड ट्रम्प प्रशासनका कामकारबाहीमा निगरानी र नियन्त्रण बढाउने बताएको छ ।

डेमोक्र्याटिक नेता तथा प्रतिनिधिसभाको सभामुख बन्ने सम्भावना रहेका हाकिम जेफ्रिजले ट्रम्प प्रशासनलाई अनियन्त्रित हुन नदिने बताउनु भएको बीबीसीले जनाएको छ ।

 उहाँले संसद्ले प्रशासनका निर्णयमाथि निगरानी बढाउने र आवश्यक परे नियन्त्रणका उपाय अपनाउने बताउनु भएको हो । केही ठाउँको अन्तिम परिणाम आउन बाँकी छ ।

अलास्कामा रिपब्लिकन उम्मेदवार ड्यान सुलिभान र डेमोक्र्याट उम्मेदवार मेरी पेल्टोलाबीच निकै कम मतान्तर रहेको छ । त्यहाँको परिणामले सिनेटको अन्तिम शक्ति सन्तुलनमा प्रभाव पार्न सक्ने विज्ञहरुको भनाइ छ ।

अलास्काको चुनावमा ड्यान सुलिभान नाम गरेका स्वतन्त्र उम्मेदवारसमेत प्रतिस्पर्धामा रहेपछि मतदातामा अन्योल सिर्जना भएको विषयले पनि चर्चा पाएको छ ।

राष्ट्रपति डोनाल्ड ट्रम्पले रिपब्लिकन उम्मेदवारसँग नाम मिल्ने स्वतन्त्र उम्मेदवारको आलोचना गर्नुभएको छ ।

चुनावपछि डेमोक्र्याटले संसद्मा आफ्नो बहुमत प्रयोग गरेर ट्रम्प प्रशासनका योजनामाथि प्रश्न उठाउन र विभिन्न नीतिगत निर्णयमा अवरोध गर्न सक्नेछन् । तर, डेमोक्र्याटले अघि सारेका योजनालाई राष्ट्रपति ट्रम्पले भिटो प्रयोग गरेर रोक्न सक्ने संवैधानिक अधिकार पनि कायम रहनेछ ।

अमेरिकी मध्यावधि चुनावपछि राष्ट्रपति र संसद्बीच शक्ति सन्तुलनको नयाँ अभ्यास देखा पर्ने अवस्था आएको छ । यसले ट्रम्प प्रशासनको बाँकी कार्यकालमा संसद् र कार्यकारी निकायबीचको सम्बन्धलाई थप महत्वपूर्ण बनाउने अपेक्षा छ ।

पछिल्लो परिणाम अनुसार प्रतिनिधिसभामा डेमोक्र्याटिक पार्टीले २५३ र रिपब्लिकन पार्टीले १५५ सिट जितेका छन् भने सिनेटमा डेमोक्र्याटिक पक्षले ५४ र रिपब्लिकनले ४४ सिट जितेका छन् । केही सिटको गणना बाँकी छ ।