काठमाण्डाै – चौथो हिमालयन हाइड्रो एक्स्पो काठमाण्डाैमा शुरु भएको छ । स्वतन्त्र ऊर्जा उत्पादकहरूको संस्था नेपाल (इप्पान) ले आयोजना गरेको तीन दिने एक्स्पोको अवसरमा स्काई टावरदेखि विद्युतीय गाडीकाे र्‍याली निकालिएको छ ।

र्‍यालीमा तीन सय वटाभन्दा बढी विद्युतीय गाडी थिए । स्काई टावरबाट शुरु भएकाे र्‍याली नयाँ बानेश्वर हुँदै कोटेश्वर, सातदोबाटो, एकान्तकुना, कुपण्डोल, लैनचौरबाट भृकुटीमण्डपमा आएर सकिएको थियो ।

एक्स्पोको उद्घाटन गर्दै ऊर्जा, जलस्रोत तथा सिँचाइमन्त्री शक्तिबहादुर बस्नेतले सरकारले आयोजना गरेको लगानी सम्मेलनलाई एक्स्पोले सार्थक बनाउने विश्वास व्यक्त गर्नुभयो । उहाँले आउँदा दिनमा सरकार, निजी क्षेत्रको हातेमालोबाट विद्युत् उत्पादनको क्षेत्रमा विकास र विस्तारका लागि काम गर्ने प्रतिबद्धता व्यक्त गर्नुभयो ।

कार्यक्रममा इप्पानका अध्यक्ष गणेश कार्कीले सरकारले सन् २०३५ सम्म १३ हजार मेगावाट बिजुली नेपालमा खपत गर्ने लक्ष्य लिएको भन्दै त्यसलाई सार्थक बनाउन एक्स्पोले भूमिका खेल्ने बताउनुभयो ।