धनुषा – ‘मुख्यमन्त्री बेटी पढाउ बेटी बचाउ’ योजना प्रदेश २ का सबै पालिकाहरुमा सुरु भएको छ ।

मुख्यमन्त्री लालबाबु राउतले आइतबार पत्रकार सम्मेलन गरी याे योजना औपचारिक रुपमा शुरु भएको घोषणा गर्नुभएकाे थियाे ।

महिला सबलीकरण र सशक्तिकरणलाई विशेष प्राथमिकतामा राखेर संघीय सरकारले प्रदान गरेको विशेष अनुदान अन्तर्गत ५० करोड र प्रदेश सरकारको ५ करोड ६० लाख रकममा यो योजना लागू गरेको मुख्यमन्त्री राउतले बताउनुभयो ।

फागुन ९ गते राष्ट्रपति विद्यादेवी भण्डारीले उदघाटन गर्नुभएको छोरी शिक्षा बीमा कार्यक्रमलाई अब प्रदेश २ का सबै पालिकाहरुमा लागू भएको मुख्यमन्त्री राउतले घोषणा गर्नुभयो ।

महिला सशक्तिकरण अन्तर्गत नयाँ जन्मिने छोरीहरुको शिक्षा बीमा गर्न प्रभु बैंकसँग सम्झौत भइसकेको र अब प्रदेशभित्रको कुनै पनि नगरपालिका तथा गाउँपालिकामा जन्मेकी छोरीलाई प्रदेश सरकारले बीमा गर्ने मुख्यमन्त्री राउतको भनाइ छ ।  

यही योजना अन्तर्गत छोरीहरुलाई साइकल वितरण गर्न टेन्डर खुलिसकेको र प्रदेशका करिब एकसय सामुदायिक विद्यालयहरुमा छात्रामैत्री शौचालय निर्माणको प्रक्रिया अन्तिम चरणमा पुगेको मुख्यमन्त्री राउतले जानकारी गराउनुभयो ।

सबै छोरीलाई शिक्षित बनाउन माघ १ गते देखि प्रदेश २ भित्र जन्मिसकेकी र अब जन्मिने छोरीलाई पारिवारिक नागरिकता तथा गाउँपालिका एवं नगरपालिकाको सिफारिसमा ती छोरीको नाममा १३ हजार ६ सय ४६ रुपैयाँ १५ पैसा प्रभु बैंकमा जम्मा गरिन्छ । र  ती छोरी २० वर्ष पुगेपछि ब्याजको रुपमा एकमुस्ट १ लाख २५ हजार पाउने व्यवस्था छ ।