दोलखा – जिल्ला कारागार दोलखा परिसरमा बनेको नयाँ भवन हस्तान्तरण नुहँदा कैदीबन्दी कोचिएर बस्न बाध्य भएका छन् ।

भवन निर्माण सम्पन्न भए पनि निर्माण व्यवसायीलाई भुक्तानी दिएर मात्रै भवन हस्तान्तरण गर्ने शहरी विकास तथा भवन निर्माण विभागले सोच बनाएपछि यस्तो समस्या आएको हो । 

कारागार निर्माण गर्ने जिम्मा लिएको खाम्पासे निर्माण सेवालाई अन्तिम भुक्तानी दिने प्रक्रियामा विभाग रहेको र भुक्तानीपछि मात्रै भवन हस्तान्तरण हुने विभागका इञ्जिनियर तुल्सी खर्बुजाले जानकारी दिनुभयो ।   

कारागारको भवन निर्माण हुँदा शहरी विकास तथा भवन निर्माण विभाग डिभिजन कार्यालय धुलिखेल र त्यसपश्चात चरिकोट कार्यालयले प्राविधिक सहयोग गरेको थियो । चरिकोटको कार्यालय खारेजीसँगै भुक्तानीका लागि आवश्यक पर्ने कागजात जुटाउन समय लागेको बताइएको छ । निर्माण व्यवसायीलाई अन्तिम भुक्तानीपश्चात यसै आर्थिक वर्षभित्र भवन हस्तान्तरण हुने इञ्जिनियर खर्बुजाले दाबी गर्नुभयो । 

यता दोलखाका प्रमुख जिल्ला अधिकारी खगेन्द्रप्रसाद रिजालले निर्माण सम्पन्न भएको भवन हस्ताण्तरण गर्न ताकेता गरिरहेको बताउनुभयो । भवन हस्तान्तरण नहुँदा क्षमताभन्दा झण्डै ६ गुणा बढी कैदीबन्दी र थुनुवा कोचिएर बस्न बाध्य छन् । हाल सञ्चालनमा रहेको कारागार भवनको क्षमता १७ जनाको भए पनि अहिले ९२ जना कैदीबन्दी र थुनुवा जिल्ला कारागार दोलखामा छन् ।

दिनप्रतिदिन कैदीबन्दी र थुनुवाको संख्या बढ्दै जाँदा उनीहरुलाई राख्न समस्या भएको कारागार प्रमुख प्रकाश नेपालले जानकारी दिनुभयो । नवनिर्मित भवन हस्तान्तरण भए यस्तो समस्याको समाधान हुने उहाँको भनाइ छ । 

नेपाल सरकारको ६४ लाखको लागतमा २०६८ सालमा शहरी विकास तथा भवन निर्माण विभाग र निर्माण कम्पनी खाम्पासे निर्माण सेवाबीच २०७१ सा भित्र कारागारको भवन निर्माण सम्पन्न गर्ने सम्झौता भएको थियो । 

तर नयाँ भवन निर्माण गर्ने स्थानमा रहेका पुराना संरचना हटाउन समय लागेको, भूकम्प र नाकाबन्दीले असर गरेको भन्दै विभागले निर्माण व्यवसायीलाई २०७५ चैत्र मसान्त सम्मको म्याद थप गरेको थियो । भवन हस्ताण्तरणमा तदारुकता नदेखाउँदा कैदीबन्दी र थुनुवा प्रत्यक्ष मारमा परेका छन् ।