पाँचथर -  जिल्लाको फाल्गुनन्द गाउँपालिकाको अध्यक्षका लागि शनिबार भएको उपचुनावमा ६६ प्रतिशत मत प्रारम्भिक अनुमान गरिएको छ ।

१६ हजार ५ सय ७७ जना मतदाता रहेको पालिकामा अनुमानित ६६ प्रतिशत मत खसेको निर्वाचन अधिकृत नवराज दुलालले वताउनुभयो । १३ मतदान स्थल र ३१ मतदान केन्द्र रहेको पालिकामा अहिले मत पेटिका संकलनको काम भैरहेको अधिकृत दुलालले बताउनुभयो । पालिकाको अध्यक्षका लागि ८ जनाले उम्मेदवारी दिएका छन् । जिल्लाको तीन स्थानमा भएको उपचुनाव शान्तिपूर्वक सम्पन्न भएको मुख्य निर्वाचन अधिकृत मोहनराज भट्टराईले वताउनुभयो ।

यस्तै फिदिम नगरपालिका–१, मा ३ हजार ६ सय ७६ मतदाता रहेको वडामा २ हजार ५ सय ८२ जना मतदाता उपनिर्वाचनमा सहभागि भएका थिए । यो वडामा ७०.२३ प्रतिशत मत खसेको छ । यो वडाको अध्यक्षका लागि ७ जनाले उम्मेदवारी दिएका छन् ।

२ हजार ६ सय मतदाता रहेको हिलिहाङ–७, मा १ हजार ६ सय ९३ (६५.१२ प्रतिशत) मत खसेको छ । यहाँ ६ जनाले वडाध्यक्षका लागि उम्मेदवरी दिएका छन् ।

फिदिम नगरपालिका–१ र हिलिहाङ–७, मा राति साढे ८ वजेदेखि मतगणना सुरु गर्ने तयारी भैरहेको प्रमुख जिल्ला अधिकारी मुरारी ओस्तीले जानकारी दिनुभयो । फाल्गुनन्द गाउपालकिाको भने आइतबार बिहान ७ वजेदेखि मतगणना सुरु गरिने निर्वाचन अधिकृत नवराज दुलालले बताउनुभयो ।