काठमाण्डौ – प्रमुख प्रतिपक्षी दल नेपाली कांग्रेसले कोरोना महामारी नियन्त्रणमा सरकार असफल भएको ठहर गर्दै ध्यानाकर्षण गराएको छ । 

कोरोना महामारीले निम्त्याउने अल्पकालीन र दीर्घकालीन समस्याको विषयमा प्रधानमन्त्रीको ध्यानाकर्षण गराउँदै कांग्रेसले सरकारले कोरोना महामारी नियन्त्रण गर्न असफल भएको बताएको हो । प्रधानमन्त्री केपी शर्मा ओलीलाई ध्यानाकर्षण पत्र बुझाएपछि कांग्रेस नेता रमेश लेखकले नेपालमा सङ्क्रमण देखिएको साढे चार महिना हुँदा पनि सरकारले तदारुकताका साथ काम गर्न नसकेको बताउनुभयो । 

सरकारले अग्रपङ्क्तिमा रहेर काम गर्नेहरुका लागि आवश्यक सुरक्षा प्रबन्ध मिलाउन नसकेको, क्वरेण्टीनको उचित व्यवस्थापन गर्न नसकेको, उचित ढङ्गले परीक्षण नभएको उहाँले बताउनुभयो । लकडाउनको साढे दुई महिनाभन्दा बढी समय बित्दासमेत सरकारले अस्पतालहरुको गुणस्तर सुधार गर्न नसकेको, मापदण्ड अनुसार आइसोलेशनको व्यवस्था गर्न नसकेको विषयमा कांग्रेसले सरकारको ध्यानाकर्षण गराएको उहाँले बताउनुभयो । 

पार्टीका वरिष्ठ नेता रामचन्द्र पौडेलको नेतृत्वमा गएको प्रतिनिधिमण्डलले तत्काल आवश्यक स्वास्थ्य सामग्री उपलब्ध गराउन, अस्पतालको क्षमता र गुणस्तर वृद्धि गर्न, उचित ढङ्गले राहत वितरण गर्न सरकारलाई सुझाव दिएको नेता लेखकले बताउनुभयो ।

ध्यानाकर्षण पत्र बुझेपछि प्रधानमन्त्री केपी शर्मा ओलीले प्राप्त सुझावहरुलाई गम्भीरताका साथ लिएको बताउनुभयो । कोरोना नियन्त्रणको लागि प्राप्त सुझावहरुलाई कार्यान्वयन गर्ने आश्वासन पनि उहाँले दिनुभएको नेता लेखकले बताउनुभयो ।

बुधबार प्रधानमन्त्री निवास बालुवाटारमा कांग्रेसको तर्फबाट नेता पौडेलसँगै प्रकाशरण महत, गोपालमान श्रेष्ठ, बालकृष्ण खाँण र रमेश लेखक ध्यानाकर्षण पत्र बुझाउन पुग्नुभएको थियो ।