धादिङ – नीलकण्ठ नगरपालिकाका मेयर भीमप्रसाद ढुङ्गानाले सुरक्षित आप्रवास परियोजना सामी अन्तर्गतका कार्यक्रमलाई सफल बनाउन आवश्यक सहयोग गर्ने बताउनुभएको छ ।

धादिङको नीलकण्ठ नगरपालिकाका जनप्रतिनिधिसँग सुरक्षित आप्रवासन परियोजनाको विषयमा अन्तक्रिया कार्यक्रममा बोल्दै मेयर ढुङ्गानाले परियोजना अन्र्तगत पालिकामा भएका कामहरु प्रभावकारी भएको भन्दै उहाँले यो कार्यक्रम गाउँगाउँमा लैजानुपर्नेमा जोड दिनुभयो ।

परियोजना अन्र्तगत धादिङमा वैदेशिक रोजगारमा जाने युवाहरुलाई सुचना तथा परामर्श गर्ने, ठगीमा परेका वा समस्यामा परेकाहरुलाई न्यायमा पैरवी गर्ने, वैदेशिक रोजगारबाट प्राप्त रेमिट्यान्सलाई सहि सदुपयोग गर्न वित्तीय साक्षरता कक्षा सञ्चालन तथा वैदेशिक रोजगारको कारण उत्पन्न भएको मनोसामाजिक समस्या तथा मानसिक समस्यामा परेकाहरुलाई परामर्श सेवा प्रदान भइरहेको छ ।

नेपाल सरकार र स्वीस सरकारबीच भएको दुई पक्षीय सम्झौता अन्तर्गत श्रम, रोजगार तथा सामाजिक सुरक्षा मन्त्रालय नेतृत्व र हेल्भटास नेपालको प्राविधिक सहयोगमा सञ्चालित सुरक्षित आप्रवासन परियोजना देशका ३९ जिल्लामा सञ्चालित छ ।