दाङ – जिल्ला प्रहरी कार्यालय दाङले बाघकाे छाला ओसारपसारमा संलग्न दुई जनालाई पक्राउ गरी सार्वजनिक गरेकाे छ ।

बुधवार पत्रकार सम्मेलन गरी जिल्ला प्रहरी कार्यालय दाङका प्रहरी प्रमुख तथा प्रहरी उपरीक्षक (एसपी) गणेश चन्दले बाघकाे छाला ओसारपसार गरी बिक्री भइरहेकाे भन्ने सूचनाको आधारमा खटिएको प्रहरी टाेलीले तुलसीपुर उपमहानगरपालिका ४ गाेठी खाेलाबाट दुई जनालाई पक्राउ गरेको जानकारी दिनुभयाे ।

पक्राउ पर्नेमा सल्यानकाे बागचाैर नगरपालिका ९ का २९ वर्षीय सन्दीप डाँगी र त्यही पालिकाकाे वडा नम्बर १५ का ३७ वर्षीय इन्द्रबहादुर थापा विक रहेका छन् । उनीहरूकाे साथबाट प्रहरीले बाघकाे टाउकाेदेखि पुच्छरसम्मकाे चार फिट पाँच इञ्च लम्बाइकाे छाला बरामद गरेकाे छ ।

यस्तै, दुवै जना सवार रा ४ प ८८४७ नम्बरकाे माेटरसाइकल र तीन थान माेबाइल पनि बरामद गरी सार्वजनिक गरिएकाे छ । 

एसपी चन्दका अनुसार त्याे छाला १० लाखमा काराेबार भइरहेकाे थियाे । पक्राउ परेका दुवै जनामाथि वन्यजन्तु मारेर ओसारपसारमा संलग्न भएकाे अभियाेगमा मुद्दा दायर गरी थप अनुसन्धानका लागि जिल्ला वन कार्यालय पठाइएकाे प्रहरी उपरीक्षक चन्दले बताउनुभयाे ।