रोल्पा – नेकपा माओवादी केन्द्रका अध्यक्ष पुष्पकमल दाहाल प्रचण्डले सकभर अफ्नै तागतमा चुनाव लड्ने बताउनुभएकाे छ । राेल्पामा आज साेमवार भएकाे कार्यक्रममा बाेल्दै उहाँले भन्नुभयाे, ‘सकभर आफ्नै तागतमा चुनाव लड्ने हो तर विशेष परिस्थितिमा बनेको यो गठबन्धनलाई पनि निरन्तरता दिन आवश्यक छ ।’   

कार्यक्रममा अध्यक्ष प्रचण्डले स्थानीय तहको चुनावमा सदरमुकाम रहेका पालिकासम्म गठबन्धन गर्ने तयारी भइरहेको बताउनुभयाे । उहाँले सबै पालिकामा गठबन्धन गर्न सम्भव नभए पनि महानगर, उपमहानगर र सदरमुकाम रहेका पालिकासम्म अहिलेकै गठबन्धन गर्ने तयारी भइरहेको बताउनुभएको हो । नेपाली कांग्रेसको केन्द्रीय समिति बैठकमा पनि धेरैजसाे नेताहरूले गठबन्धन गर्ने मत व्यक्त गरेकाले स्थानीय चुनावमा पनि गठबन्धन हुने निश्चित भएको उहाँको भनाइ छ ।

देशभर चुनावी माहोल बढेकाले सबै दल आ–आफ्नै पक्षमा जनमत बनाउन लागेकाले आफ्नो पार्टीले पनि त्यही नीतिलाई अघि सारेको अध्यक्ष प्रचण्डले बताउनुभयो । आजै उहाँले रोल्पा नगरपालिकाले निर्माण गरेको जनयुद्ध स्मृति भ्यु टावरको उद्घाटन र माओवादी केन्द्र रोल्पाले लिबाङमा आयोजना गरेको जनसभालाई सम्बोधन गर्नुभएको थियो ।