काठमाण्डौ – लगातारको वर्षाका कारण मान्यजनका हातबाट टीका जमरा र आर्शीवाद थाप्न जानेहरु समस्यामा परेका छन् ।

हिजो दिउँसो केहीबेर पानी पर्न रोकिए पनि बेलुकीदेखि लगातार परिरहेको छ । पानी परे पछि टाढा टाढा आफन्तकहाँ नवदुर्गाको प्रसाद स्वरुप टीका, जमरा र आशीर्वाद लिन जाने समस्यामा परेका हुन् ।

कोरोना भाइरसको जोखिमका कारण दुई वर्षसम्म राम्ररी दशैँ मनाउन नपाएकाले यसपालि उत्साह धेरै थियो । तर, लगातारको झरीले ओहोरदोहोरमा समस्या बनाइदिएको छ ।

वर्षाका कारण सडकमा आशीर्वाद थाप्न जानेको चहलपहल देखिँदैन । काठमाण्डौ उपत्यका बाहिर गएका मानिस विजयादशमीपछि राजधानी आउने गरेकामा वर्षाले रोकिएका छन् ।

जल तथा मौसम विज्ञान विभाग, मौसम पूर्वानुमान महाशाखाले नेपालमा दक्षिण पश्चिम बङ्गालको खाडी र आन्ध्र प्रदेश आसपास बनेको न्यून चापीय प्रभावले वर्षा भएको जनाएको छ । पर्सी शनिवारसम्म नै पानी पर्ने सम्भावना रहेकाले सतर्कता अपनाउन मौसविद्ले आग्रह गरेका छन् ।