मुगु – मुगुको छायाँनाथ रारा नगरपालिकाले विपन्न परिवारलाई हरेक महिना पाँच किलो आयोडिनयुक्त नुन निःशुल्क दिने भएको छ ।

गरिबसँग नगर प्रमुख कार्यक्रमअन्तर्गत चार हजारभन्दा धेरै विपन्न परिवारलाई वडा कार्यालयमार्फत हरेक महिना घरघरमा नुन उपलब्ध गराउने निर्णय भएको मेयर विष्णुकुमार भामले जानकारी दिनुभयो ।

नुन किन्नकै लागि सदरमुकाम गमगढी पुग्नुपर्ने बाध्यता अन्त्य गर्न नगरपालिकाले वडाबाटै नुन किनेर दिने नीति लिएको छ । विपन्न घरधुरीलाई उपलब्ध गराएको परिचयपत्रका आधारमा नुन दिने व्यवस्था गरिएको हो । परिचयपत्रको नवीकरणसमेत वडा कार्यालयमार्फत हुनेछ ।

नागरिकताको आधारमा पाँच पोका नुन लिन विपन्न समुदाय गाउँदेखि सदरमुकाम गमगढी पुग्नुपर्ने बाध्यता छ । वडाबाटै नुन उपलब्ध हुने भएपछि सदरमुकाम पुग्नुपर्ने समस्या अन्त्य हुनेछ ।