काठमाण्डाै – प्रधानमन्त्री केपी शर्मा ओलीले कोरोनाको जोखिम बढीरहेकाले जनस्वास्थ्यका सबै मापदण्ड पालना गर्न आग्रह गर्नु भएको छ ।

आज देशवासीका नाममा सम्बोधन  गर्दै प्रधानमन्त्री ओलीले नागरिकको रक्षा गर्नु सरकारको पहिलो प्राथमिकता भएको बताउनु भएको हो । उहाँले भन्नुभयो –‘नागरिकको जीवन नै रहेन भने कुनै पनि कुरा रहँदैन, फेरि कुनै कुरा सञ्चालनमा आउन र चल्न सक्दैन । नागरिक सुरक्षित रहे मात्रै उद्योग कलकारखानालाई फेरि सञ्चालन गर्न सकिन्छ ।’

सरकारले नागरिकको जीवनको सुरक्षालाई प्राथमिकतामा राखेर त्यहि अनुसार रणनीति बनाएकाले कोरोना सङ्क्रमणपछिको मृत्युदरलाई अन्य देशको तुलनामा न्यून राख्न सफल भएको पनि उहाँले बताउनुभयो । कोरोनाका कारण अर्थतन्त्रमा केही असर परे पनि व्यापार घाटालाई सन्तुलनतर्फ फर्काउने प्रयास गरेको, कृषि क्षेत्रमा केही उपलब्धि बढेको उहाँको भनाइ छ ।

यस्तै उहाँले अघिल्लाे वर्षलाई सफलताको वर्ष मान्नु पर्ने पनि बताउनुभयाे । राजनीतिक हिसाबले पृथकतावादी सोचलाई अन्त्य गर्दै राष्ट्रिय एकतामा ल्याएको र हिंसाको बाटो लिइरहेको समूहलाई शान्तिपूर्ण राजनीतिमा फर्काउन सफल भएको उहाँकाे भनाइ छ ।

'अब देशमा हिंसाको राजनीति छैन । नागरिक नै सार्वभौमसत्ता सम्पन्न भएका  छन्' उहाँले भन्नुभयाे, 'नागरिकको अभिमत नै सबै भन्दा ठूलो कुरा हाे ।'