काठमाण्डौ - चिनियाँ खेलाडी होउ झिहुइले शनिवार टोकियो ओलम्पिकमा भारोत्तोलनतर्फ ४९ किलोग्रामतर्फको प्रतिस्पर्धामा स्वर्ण पदक जितिन्। २४ वर्षीया उनले भारतीय खेलाडीलाई पछि पार्दै उपाधि जितेकी हुन् । अहिले उनको एउटा तस्बिरले तरङ्ग ल्याएको छ। 

बेलायती समाचार संस्था रोयटर्सले छापेको होउको तस्बिरले चिनियाँ सामाजिक सञ्जाल प्रयोगकर्तामाझ मात्र होइन सरकारी अधिकारीलाई पनि आक्रोशित बनाएको छ । दुई दिनअघि रोयटर्सले समाचारसँगै आफ्नो ट्वीटरमा राखेको तस्बिरले खेलाडी र चीनलाई होच्याएको अर्थमा धेरैले बुझेका छन् । प्रतियोगिताका क्रममा भार उचाल्दा उनको अनुहारको भाव बदलिएको थियो, जुन स्वाभाविक हो । तर, उनको यही तस्बिर रोयटर्सले छापिदिएको थियो ।

यसअघि टोकियो ओलम्पिकमा चीनले पहिलो स्वर्ण जितेपछि अमेरिकी टेलिभिजन सीएनएनले चीनलाई स्वर्ण पदक र कोभिडको थप सङ्क्रमण शीर्षकमा खबर छापेको थियो । चिनियाँ अधिकारीले सीएनएनले जानीबुझी यस्तो शीर्षक राखेको भन्दै टिप्पणी गरेका थिए । यस्तै, अमेरिकाको एबीसी न्युज टेलिभिजनले टोकियो ओलम्पिकको उद्घाटनका क्रममा चीनको अधुरो नक्सा देखाएको भन्दै चिनियाँहरूले आलोचना गरेका थिए । 

पश्चिमा देशका सञ्चारमाध्यमले आफूबारे छापेको खबरप्रति चिनियाँ अधिकारीले असन्तुष्टि जनाउँदै आएका छन् ।