ओखलढुंगा – ओखलढुंगाकाे लिखु गाउँपालिका अध्यक्षमा नेपाली कांग्रेसका अशोककुमार कार्की विजयी हुनुभएको छ । उहाँले नेकपा एमालेका उम्मेदवार मिलनकुमार विष्टलाई २८४ मतान्तरले पछि पार्दै जित हात पार्नुभएको हो ।  

एमालेको गढका रुपमा रहेको लिखुमा यस पटक कांग्रेसले वहुमतसहित प्रमुखमा बाजी मारेको छ । कार्कीले तीन हजार सात सय ७६ मत ल्याउँदा एमालेका विष्टले तीन हजार चार सय ९२ मत पाउनुभयो । यस्तै उपाध्यक्षमा भने नेकपा एमालेकी अस्मिता थापा कांग्रेसको भन्दा ११ सय बढी मत ल्याएर विजयी हुनुभएको छ । थापाले चार हजार ११६ मत प्राप्त गरी विजयी हुँदा कांग्रेसकी प्रेमकुमारी दाहालले ३ हजार ९३ मत प्राप्त गर्नुभएको छ । 

९ वडा रहेको यो पालिकामा नेपाली कांग्रेसले ५ नेकपा एमालले ३ र माओवादीले १ वडा जितेका छन् । यसअघि एमालेले ४ वडा र प्रमुख उप्रमुख दुवै जितेको थियो ।