सुर्खेत – प्रतिनिधि सभा र प्रदेशसभा सदस्य निर्वाचनका लागि सुर्खेतमा पनि उत्साहजनक रूपमा मतदान भइरहेको छ ।

अहिलेसम्म काहीँबाट पनि सुरु नभएको भन्ने जानकारी नआएको र सबै मतदान स्थलमा मतदाताहरूले उत्साहजनक रूपमा मतदान गरिरहेको प्रदेश निर्वाचन अधिकारी दुर्गा प्रसाद चालिसेले जानकारी दिनुभयो ।

‘हामी केही मतदान स्थलमा पुग्दा उत्साहजनक रूपमा मतदान भइरहेको देख्यौँ, उहाँले भन्नुभयो ‘अहिलेसम्म कतैबाट पनि सुरु नभएको भनेर खबर आएको छैन ।’

सुर्खेतमा एक सय ३९ वटा मतदान स्थल र २९३ मतदान केन्द्र छन् । दुई वटा प्रतिनिधि सभा र चार वटा प्रदेश सभा निर्वाचन क्षेत्र रहेको सुर्खेतमा दुई लाख ४३ हजार ६१४ मतदाता रहेका छन् ।

सुर्खेत क्षेत्र नम्बर १ मा एक लाख २० हजार ९ सय ४० र क्षेत्र नम्बर २ मा एक लाख २२ हजार ६ सय ७४ मतदाता रहेका छन् ।