सम्पर्कविहीन कर्मचारीमाथि कारबाही शुरू

काठमाण्डाै – कृषि, वन तथा पर्यावरणमन्त्री गीता चौधरीले लामो समयदेखि सम्पर्कविहीन रहेका कर्मचारी हटाउने कामको शुरुआत गर्नुभएको छ ।

नेपाल कृषि अनुसन्धान परिषद् (नार्क) को अध्यक्षसमेत रहनुभएकी चौधरीले लामो समयदेखि कार्यालयमा अनुपस्थित रहेका २ जना कर्मचारीलाई सेवाबाट हटाएर सम्पर्कविहीन हुने कर्मचारीमाथि कारबाही शुरू गर्नुभएको हो ।

सेवाबाट हटाएका कर्मचारीमा कृषि अनुसन्धान निर्देशनालय सुनसरीमा कार्यरत प्राविधिक अधिकृत छैटौँ पार्वती जोशी र राष्ट्रिय जैविक प्रविधि अनुसन्धान केन्द्र ललितपुरकाे खुमलटारमा कार्यरत वैज्ञानिक एस–१ नमिता भट्टराई हुनुहुन्छ ।

मन्त्री चाैधरीले दरबन्दी मात्र ओगटेर सम्बन्धित कार्यालयमा उपस्थित भई जिम्मेवारी पूरा नगर्ने कर्मचारीविरुद्ध आवश्यक कारबाही गरिएको बताउनुभयाे । अब मन्त्रालयअन्तर्गत रहेका विभाग, केन्द्रलगायत निकायहरूबाट सम्पर्कविहीन रहेका कर्मचारी पनि हटाउने उहाँकाे भनाइ छ ।