यमनको लालसागरमा युद्ध, माझीहरूको जीविकोपार्जन संकटमा

यमनको लालसागर तटमा लामो समयदेखि जारी द्वन्द्वका कारण हजारौँ माझीको रोजगारी र जीविकोपार्जन संकटमा परेको छ ।

इन्धन र डुङ्गा भाडा महँगो हुनुका साथै समुद्रमा गोली चल्ने, समुद्री खानी विस्फोट हुने र विभिन्न समूहले माछा मार्न प्रतिबन्ध लगाउने गरेका कारण पनि माझीहरूको रोजगारी र जीविकोपार्जन संकटमा परेको अल–जजीराको खबरमा उल्लेख छ ।

युद्धका कारण यमनको माछा मार्ने उद्योगमा पनि ठूलो रूपमा प्रभावित भएको छ । सन् २०१८ को एक अध्ययनअनुसार यस क्षेत्रबाट हुने माछा निर्यात करिब ७० प्रतिशतले घटेको थियो । सन् २०१५ मा यमनमा युद्ध शुरु भएयता समुद्रमा माछा मार्ने काम जोखिमपूर्ण बनेको छ । माझीहरूका अनुसार हुथी विद्रोही र सरकार समर्थक दुवै पक्षले विभिन्न समयमा समुद्रमा जान प्रतिबन्ध लगाउने गरेका छन् ।

समुद्री खानीका कारण पनि उनीहरूको ज्यान जोखिममा परेको छ । अल–खोखास्थित मछुवा संघका प्रमुख फौद दोब्लाका अनुसार लाल सागरको अवस्थाबाट ३० हजारभन्दा बढी माझी प्रभावित भएका छन् ।

समुद्री खानी विस्फोटमा २६४ जना माझीको मृत्यु भएको र २१५ जना अपाङ्ग भएको दाबी पनि मछुवा संघले गरेको छ । साथै  सन् २०२३ यता ११३ जना माझी बेपत्ता भएका छन् । युद्धमा आफ्नो कुनै भूमिका नभए पनि त्यसको सबैभन्दा ठूलो असर आफूहरूले भोग्नुपरेको माझीहरूको गुनासो छ ।