६ घण्टामा कपिलवस्तुको रङ्गाईमा ११०.८ मिलिमिटर वर्षा

काठमाण्डाै – अहिले देशका विभिन्न ठाउँमा पानी परिरहेको छ । आज दिउँसो सुदूरपश्चिमबाहेक अन्य प्रदेशका विभिन्न जिल्लामा पानी परेको मौसम पूर्वानुमान महाशाखाले जनाएको छ ।

लुम्बिनीको तराई भागका केही ठाउँमा ठूलो पानी परेको छ । पछिल्लो ६ घण्टामा सबैभन्दा धेरै कपिलवस्तुको रङ्गाईमा ११०.८ मिलिमिटर वर्षा मापन भएको छ । त्यस्तै दाङको घोराही, अर्घाखाँची, नवलपरासीलगायतका जिल्लामा पनि ठूलो पानी परेको छ ।

दिउँसो ठूलो पानी परेका क्षेत्र आसपासमा थप वर्षाको समेत सम्भावना रहेको महाशाखाले जनाएको छ । लुम्बिनी र गण्डकी प्रदेशका केही ठाउँमा ठूलो पानी पर्न सक्ने भएकाले विशेष सावधानी अपनाउन महाशाखाको अनुरोध छ ।

यस्तै काठमाण्डौ उपत्यका आसपासका क्षेत्रमा पनि ठूलो पानी पर्ने सम्भावना छ । आजराति देशका अरू धेरैजसो ठाउँमा पनि मध्यमसम्म वर्षाको सम्भावना छ ।