सडक अवरुद्ध हुँदा रोल्पाका पहिरोपीडितले पर्याप्त राहत पाएनन्

काठमाण्डौ — रोल्पाको थबाङ गाउँपालिका–५, उवा गाउँमा बाढीपहिरो पीडितले पर्याप्त राहत सामग्री पाउन सकेका छैनन् । ठाउँ–ठाउँमा सडक अवरुद्ध हुँदा प्रभावितसम्म राहत सामग्री पुर्‍याउन कठिन भएको गाउँपालिकाले जनाएको छ ।

थबाङ गाउँपालिकाका अध्यक्ष ऋषिकेश बुढा मगरका अनुसार गाउँपालिकाले आवश्यक राहत सामग्री प्रभावित क्षेत्रमा पुर्‍याइरहेको भए पनि अरु संघसंस्था तथा निकायले सडक अवरुद्ध भएका कारण राहत सामग्री प्रभावितसम्म लैजान सकेका छैनन् ।

गाउँपालिकाले भने भरियामार्फत सामग्री बोकाएर प्रभावित परिवारलाई राहत वितरण गरिरहेको उहाँले उज्यालोलाई जानकारी दिनुभयो । गाउँपालिकाले प्रभावितका लागि तत्काल आवश्यक ओढ्ने–ओछ्याउने सामग्री, खाद्यान्न तथा लत्ताकपडालगायतका सामग्री वितरण गरेको जनाएको छ ।

उवा पुग्ने मुख्य सडक विभिन्न ठाउँमा पहिरोले भत्किएपछि राहत सामग्री फुलीवन, पोबाङ र माबाङमै रोकिएका छन् । अध्यक्ष बुढा मगरले सडक तत्काल खुल्ने अवस्था नरहेको बताउनुभयो । निरन्तर वर्षाका कारण सडक खुलाउने प्रयाससमेत जोखिमपूर्ण बनेको छ । कतिपय ठाउँमा पहिरो तथा ढुंगा खस्ने जोखिमका कारण पैदल बाटोसमेत प्रयोग गर्न कठिन भएको छ ।

कतिपय संघसंस्थाले राहत सामग्री स्थानीय जनप्रतिनिधिलाई हस्तान्तरण गरेर फर्किएका छन् । सडक, सञ्चार तथा विद्युत् सेवा अवरुद्ध हुँदा प्रभावित बस्तीका नागरिकको जनजीवन थप कष्टकर बनेको छ ।

गएको साउन २७ गते थबाङ गाउँपालिका–५, उवामा बाढीपहिरो र साउन २८ गते राति सुनछहरी गाउँपालिका–२, भित्रीगामका विभिन्न ठाउँमा पहिरोले जनधनको क्षति गरेको थियो । पहिरोबाट प्रभावित परिवार अहिले आफन्तको घरमा आश्रय लिएर बसिरहेका छन् ।