नेपाल ‘ए’ टोलीको पहिलो जित, होबार्ट हुरिकेन्स ३९ रनले पराजित

काठमाण्डौ — नेपाल ‘ए’ क्रिकेट टोलीले टप एन्ड टी–२० शृङ्खलामा पहिलो जित निकालेको छ ।

अस्ट्रेलियामा चलिरहेको शृङ्खलाअन्तर्गत हिजो भएको आफ्नो तेस्रो खेलमा नेपालले होबार्ट हुरिकेन्स एकेडेमीलाई ३९ रनले पराजित गरेको हो । नेपालले दिएको १५५ रनको लक्ष्य पछ्याएको हुरिकेन्स १८ ओभर ३ बलमा ११५ रनमा अलआउट भयो ।

हुरिकेन्सका नितेश सामुएलले ३७, टिम वार्डले २३ र निभेथन राधाकृष्णनले २० रन बनाए । नेपालका नारायण जोशीले ३ विकेट लिए । शाहब आलम र पवन सर्राफले समान २–२ तथा बिपिन खत्रीले १ विकेट लिए ।

त्यसअघि पहिले ब्याटिङ गरेको नेपालले निर्धारित २० ओभरमा ८ विकेट गुमाएर १५४ रन बनाएको थियो । यो खेलमा कुशल भुर्तेलले ३९, मयन यादवले ३१ तथा कप्तान अनिलकुमार साहले २८ रन बनाए ।

नेपाल पहिलो खेलमा नर्दन टेरिटोरी स्ट्राइक र दोस्रो खेलमा बङ्गलादेश हाई प्रफरमेन्स–११ सँग पराजित भएको थियो ।