बाढीले रसुवाका विभिन्न जलविद्युत् आयोजनामा क्षति, बिजुली अवरुद्ध

काठमाण्डाै – रसुवामा आज बिहान आएको बाढीले त्यहाँ सञ्चालनमा रहेका र निर्माणाधीन जलविद्युत् आयोजनाहरूमा क्षति गरेको छ ।

नेपाल विद्युत् प्राधिकरणका अनुसार रसुवागढी, चिलिमे, त्रिशूली–३ ए, त्रिशूली–३ बी हब २३० केभी स्टेशन, त्रिशूली तथा देवघाट जलविद्युत् केन्द्रमा क्षति पुगेको छ । यी आयोजना प्रभावित क्षेत्रमा बिजुली अवरुद्ध भएको छ ।

बाढीले जलविद्युत् आयोजनासहित अन्य भौतिक संरचना घर, सडक, पुललगायतमा क्षति पुगेको छ ।

यस्तै नेपाल टेलिकमका अनुसार टेलिकमको सञ्चार पूर्वाधारमा क्षति पुग्दा प्रभावित क्षेत्रमा टेलिफोन तथा इन्टरनेट सेवा पनि प्रभावित भएको छ । बाढीले टेलिकमका ७ वटा टावर र अप्टिकल फाइबरमा क्षति पुर्‍याएको प्रारम्भिक अनुमान छ ।

रसुवामा २ र नुवाकोटमा ५ वटा टेलिकमको टावरमा भौतिक क्षति पुगेको पछिल्लो विवरण छ ।