अर्थमन्त्री वाग्ले र भारतीय समकक्षी सीतारमणबीच भेटवार्ता

काठमाण्डौ – भारत भ्रमणमा रहेका अर्थमन्त्री स्वर्णिम वाग्ले र भारतीय समकक्षी निर्मला सीतारमणबीच भेटवार्ता भएको छ ।

हिजो बेलुकी नयाँदिल्लीमा रहेको भारतीय वित्त मन्त्रालयमा उहाँहरुबीच भेटवार्ता भएको हो । त्यसक्रममा उहाँहरुबीच भोटेकोशी बाढीपछिको पुनर्निर्माण, व्यापार, लगानी, ऊर्जा, कनेक्टिभिटीलगायत विषयमा छलफल भएको दिल्लीमा रहेको नेपाली दूतावासले जनाएको छ ।

भारत सरकारको निमन्त्रणामा अर्थमन्त्री वाग्ले तीनदिने भ्रमणका लागि हिजो नयाँदिल्ली जानुभएको हो । भ्रमणका क्रममा अर्थमन्त्री वाग्लेले विदेशमन्त्री एस. जयशंकरसँग भेटवार्ता गर्ने कार्यक्रम छ ।

आज बिहान पूर्वविदेशसचिव श्याम शरणले आयोजना गर्ने उच्चस्तरीय कूटनीतिक संवादमा वाग्ले प्रमुख अतिथिका रूपमा सहभागी हुनुहुनेछ । त्यसपछि विदेशमन्त्री जयशंकरसँग भेटवार्ता गर्ने कार्यक्रम छ ।