व्यवसायीलाई पक्राउ गरेरमात्रै नेपाललाई ग्रे लिस्टबाट बाहिर निकाल्न सकिँदैन :  पूर्वअर्थमन्त्री खतिवडा

काठमाण्डौ - पूर्वअर्थमन्त्री डा. युवराज खतिवडाले उद्योगी व्यवसायीलाई पक्राउ गरेरमात्रै नेपाललाई ग्रे लिस्टबाट बाहिर निकाल्न नसकिने बताउनुभएको छ । 

काठमाण्डौमा आयोजित एक कार्यक्रममा बोल्दै उहाँले नेपाल ग्रे लिस्टबाट बाहिरिन सरकारले विश्वसनीय ढङ्गले काम गरेर त्यसको परिणाम देखाउनुपर्ने बताउनुभयो । पूर्वगभर्नरसमेत रहेका उहाँले ग्रे लिस्टबाट बाहिरिने नाममा अनावश्यक रूपमा बैङ्कका कर्मचारी तथा बैंकरलाई पक्राउ गर्ने वा दबाव दिने कार्य गर्न नहुने बताउनुभयो । 

अपराध पुष्टि नभएको अवस्थामा अदालतबाट छुट्ने भएकाले त्यस्ता कदमले अपेक्षित परिणाम नदिने उहाँको भनाइ छ । उहाँले ग्रे लिस्टबाट बाहिरिनका लागि अन्तर्राष्ट्रिय निकायले कार्यान्वयन र परिणाम खोज्ने बताउनुभयो । 

ग्रे लिस्टबाट बाहिरिन नसके बैङ्किङ प्रणाली, अन्तर्राष्ट्रिय व्यापार र पुँजी प्रवाहमा असर पर्ने उनले बताए। नेपाललाई विगतमा ग्रे लिस्टबाट बाहिर निकाल्न निकै कठिनाइ भोग्नुपरेको स्मरण गर्दै उहाँले सरकारले यस विषयलाई प्राथमिकतामा राख्नुपर्ने बताउनुभयो ।