एशियाडको उद्घाटन समारोहमा चन्द्रबहादुर र मानमतीले बोके नेपालको झण्डा

काठमाण्डौ – जापानको आइची–नागोयामा आयोजना भएको २०औँ एसियाली खेलकुद प्रतियोगिताको हिजो औपचारिक उद्घाटन भएको छ ।

उद्घाटन समारोहमा नेपालका तर्फबाट बक्सर चन्द्रबहादुर थापामगर र महिला कबड्डी खेलाडी मानमती विष्टले राष्ट्रिय झण्डा बोकेर मार्चपास गरेका छन् ।

थापामगरले गएको वर्ष सम्पन्न विश्व बक्सिङ च्याम्पियनसिपमा कास्य पदक जितेका थिए । मानमती विष्ट सन् २०२३ मा चीनको हाङझाउमा सम्पन्न १९औँ एसियाली खेलकुदमा कास्य पदक जितेको नेपाली महिला कबड्डी टोलीकी सदस्य हुन् ।

यसपटकको एसियाली खेलकुदमा नेपालबाट २१ खेलमा १३५ खेलाडी सहभागी छन् । राष्ट्रिय खेलकुद परिषद् (राखेप)का अनुसार नेपाली टोलीमा ५७ महिला र ७८ पुरुष खेलाडी रहेका छन् । नेपाली खेलाडीले एथलेटिक्स, बक्सिङ, कराते, तेक्वान्दो, पौडी, कबड्डी, सुटिङ, भारोत्तोलन, जुडो, ब्याडमिन्टनलगायत विभिन्न खेलमा प्रतिस्पर्धा गर्नेछन् ।

नेपालले यसपटक विभिन्न खेलमा पदक जित्ने लक्ष्यसहित सहभागिता जनाएको छ । विशेषगरी करातेकी एरिका गुरुङ, बक्सिङलगायतका खेलाडीबाट नेपालले पदकको अपेक्षा गरेको छ । एरिकाले १९औँ एसियाली खेलकुदमा नेपालका लागि रजत पदक जितेकी थिइन् ।

प्रतियोगितामा नेपालसहित ४५ देश र एक शरणार्थी टोलीका खेलाडी सहभागी छन् । एसियाली खेलकुदलाई एसिया महादेशकै ठूलो बहुखेलकुद प्रतियोगिताका रूपमा लिइन्छ ।

मिजुहो पार्क रङ्गशालामा हिजो आयोजित भव्य समारोहमा जापानका सम्राट नारुहितोले प्रतियोगिताको औपचारिक उद्घाटन गर्नुभयो । उद्घाटन समारोहमा विभिन्न सांस्कृतिक प्रस्तुति, सङ्गीत तथा सहभागी राष्ट्रका खेलाडीको मार्चपासलगायत कार्यक्रम आयोजना गरिएको छ ।